नाशिक पतीस चांगली नोकरी लावून देण्याचे आमिष दाखवून महिलेशी प्रेमसंबध प्रस्थापित करीत एकाने सुमारे नऊ लाख रुपयांना गंडविल्याचा प्रकार समोर आला आहे. महिलेने पैशांची मागणी केल्यानंतर संशयित आरोपीने अनैतिक संबंध उघड करण्याची धमकी दिली. संशयिताचा इरादा स्पष्ट झाल्याने महिलेने सातपूर पोलिस ठाणे गाठले. महिलेच्या तक्रारीनुसार पोलिसांनी फसवणुकीचा गुन्हा दाखल केला. योगेश नारायण गांगुर्डे (रा. कामगारनगर, सातपूर) असे संशयित आरोपीचे नाव आहे. परिसरात राहणाऱ्या एका ओळखीच्या महिलेच्या घरी त्याचे येणे-जाणे होते. आपली एमआयडीसीतील विविध संस्था, कंपन्यांमध्ये ओळख असल्याचे तो महिलेसह तिच्या पतीला भासवत असे. याच आधारे त्याने या कुटुंबाचा विश्वास संपादन केला. महिलेच्या पतीस चांगल्या नोकरीस लावून देतो, असे आमिष दाखवून संशयिताने महिलेशी प्रेमसंबध प्रस्थापित केले. २०१३ ते जून २०१८ दरम्यान महिलेच्या पतीस नोकरी लावून देण्याच्या बहाण्याने संशयित आरोपीने पीडितेकडून तब्बल आठ लाख ९० हजार रुपये वेळोवेळी उकळले. सातत्याने पैसे उकळणाऱ्या संशयिताने पाच ते सहा वर्षे उलटूनही महिलेच्या पतीस कुठलीही नोकरी दिली नाही. यामुळे पीडितेने १६ जून रोजी संशयित आरोपीची भेट घेतली. यावेळी संशयिताने शिवीगाळ व दमदाटी करीत पैसे देण्यास नकार दिला. ‘तुला काय करायचे कर’, असे आव्हान देत आपल्या प्रेमसंबधाची वाच्यता तुझ्या पतीकडे करेल, अशी धमकी संशयित आरोपीने पीडित महिलेला दिली. या प्रकारानंतर महिलेने पोलिस ठाणे गाठून तक्रार दिली. या प्रकरणी फसवणुकीचा गुन्हा दाखल करण्यात आला आहे.