हरयाणात आज सकाळी हवाई दलाच्या जॅग्वार लढाऊ विमानाला पक्ष्याने धडक दिल्याने या विमानाचं तात्काळ लँडिंग करण्यात आलं. दरम्यान, विमानाचं तात्काळ लँडिंग करताना विमानाचा काही भाग रहिवासी परिसरात कोसळला. मात्र या दुर्घटनेमुळे कोणतीही हानी झाली नसल्याचं हवाई दलाकडून स्पष्ट करण्यात आलंय.
या लढाऊ विमानानं आज सकाळी अंबाला एअरफोर्स स्टेशनवरून उड्डाण घेतलं होतं. विमानाच्या उड्डाणानंतर काही वेळातच एका पक्ष्याने विमानाला धडक दिली. त्यामुळे विमानाचं तात्काळ लँडिंग करण्यात आलं. यावेळी विमानाचे काही भाग रहिवासी भागात कोसळल्याने खळबळ उडाली. मात्र यात कोणतीही हानी झाली नाही.
यापूर्वी दिल्लीहून मुंबईला येत असलेल्या इंडिगोच्या विमानाच्या इंजिनला पक्ष्याची धडक बसल्याने इंडिगोचं उड्डाण रद्द करावे लागलं होतं. पक्ष्याची धडक बसल्यानंतर विमानाच्या इंजिनामध्ये कंपन निर्माण झाल्याने हे विमान माघारी नेण्याचा निर्णय घेण्यात आला होता.