जेवण कमी पडल्याने आईशी वाद घालून, तिला बेदम मारहाण केल्याचा धक्कादायक प्रकार कोंढव्यात घडला आहे. आईला वाचविण्यासाठी आलेल्या भावालाही त्याने मारहाण केल्यामुळे या घटनेत दोघेही जखमी झाले आहेत. या प्रकरणी कोंढवा पोलिस ठाण्यात गुन्हा दाखल करण्यात आला आहे.
रवी चंद्रकांत सरतापे (वय ३०, राकोंढवा) असे अटक केलेल्याचे नाव आहे. या प्रकरणी त्याच्या वडिलांनी कोंढवा पोलिसांकडे तक्रार दिली आहे. पोलिसांनी दिलेल्या माहितीनुसार, रवीचे बीबीएपर्यंत शिक्षण झाले आहे. तो एका खासगी कंपनीत नोकरी करतो व अविवाहित आहे. रविवारी रात्री घरी आल्यावर त्याने आईला जेवण वाढायला सांगितले. ते कमी पडले, तोपर्यंत आई झोपली होती. रवीने आईला झोपेतून उठवले. जेवण कमी पडल्यावरून वाद घालण्यास सुरुवात केली. या वादात त्याने फरशी पुसण्याच्या मॉपने मारहाण केली, तेव्हा त्याचा मोठा भाऊ आईला सोडविण्यास मध्ये पडला. रवीने त्यालाही मारहाण केली. यात आई गंभीर जखमी झाली आहे. माहिती मिळताच कोंढवा पोलिसांनी रवीला अटक केली. त्याला मंगळवारी शिवाजीनगर कोर्टात हजर करण्यात आले. या वेळी कोर्टाने त्याची येरवडा कारागृहात रवानगी केली.