मुंबई-पुणे एक्स्प्रेस-वे २५ जून रोजी दुपारी एक ते दीड या दरम्यान दोन्ही बाजुंनी बंद करण्यात येणार आहे. पुणे-मुंबई मार्गावर परंदवाडी येथे महावितरणची केबल टाकण्यासाठी पूर्ण रस्ता बंद करण्यात येणार असल्याची माहिती महामार्ग पोलिसांनी दिली. या ठिकाणी महावितरणची ओव्हरहेड हायटेंशन केबल तुटली असून तिचे काम प्रस्तावित असल्याचे महामार्ग पोलिसांनी कळविले आहे.
या कालावधीमध्ये मुंबईहून पुण्याकडे आणि पुण्याहून मुंबईकडे जाणारी वाहतूक अर्ध्यातासासाठी बंद करण्यात येणार आहे. या दरम्यान परंदवाडी (किलोमीटर ८४.४००) या ठिकाणापासून अर्धा किलोमीटर अंतरावर सर्व प्रकारची अवजड, मालवाहतूक करणारी वाहने थांबविण्यात येणार आहे. तर, मुंबईकडे जाणारी हलकी आणि प्रवासी वाहने ही किवळे पुलापासून जुन्या पुणे-मुंबई महामार्गावरून वळविण्यात येणार आहेत. तसेच, पुण्याकडे येणारी हलकी, चारचाकी तसेच प्रवासी वाहने ही उर्से टोलनाका येथून जुन्या पुणे-मुंबई मार्गावर वळविण्यात येणार असल्याची माहिती महामार्ग पोलिस दलाचे अधीक्षक मिलिंद मोहिते यांनी दिली.