पवईतील हीरानंदानी परिसरात एका १९ वर्षीय युवतीसमोर एका ऑटोरिक्षा चालकाने हस्तमैथून केल्याची तक्रार युवतीने केली आहे. ही युवती मॅनेजमेंटची विद्यार्थीनी असून घटनेदरम्यान ती बाहेर फिरण्यासाठी निघाली होती. घटनेनंतर या युवतीने ट्विटदवारे पोलिसांना ही माहिती दिली. त्यानंतर तातडीने पोलिसांचे एक पथक घटनास्थळी दाखल झाले.
या घटनेबाबत मिळालेल्या माहितीनुसार, दुपारी सुमारे १२ वाजता ही युवती हीरानंदानी परिसराच जॉगिंग करत होती. ती तलावाच्या दिशेने धावत होती. हायवे दिसल्यानंतर ती पुन्हा मागे फिरली. पुढे बरेच लोक घोळका करून उभे असल्याचे दिसल्याने युवती घाबरली. त्यानंतर युवती जवळच असलेल्या एका बँकेच्या एटीएमजवळ पारऱ्यांवर बसली. त्यानंतर समोरच उभ्या असलेल्या एका ऑटोरिक्षाचा चालक तिच्याकडे रोखून पाहत असल्याचे तिला आढळले. काही सेकंदांनंतर तर तो चक्क आपल्याकडे पाहून हस्तमैथून करत असल्याचे तिला दिसले.
ही व्यक्ती ऑटोरिक्षा ड्रायव्हरच्या गणवेशात होती. हे पाहिल्यावर पीडित तरुणी भेदरली. घाबरल्याने ना ती चालकाचा सामना करू शकली, ना ऑटोरिक्षाचा नंबर लिहून घेऊ शकली. पीडित युवती सन २०१५ पासून मुंबईत राहत आहे.
आसपासच्या सीसीटीव्हीमध्ये ही घटना कैद झालेली असणार असे पीडित युवतीने सांगितले. आसपासच्या परिसरात अनेक कार्यालये असल्याने सीसीटीव्ही फूटेज सहज उपलब्ध होऊ शकेल, असेही युवती म्हणाली. ही अत्यंत गंभीर घटना असून तपास सुरू असल्याचे पोलिसांना सांगितले. परिसरातील सर्वच ऑटोरिक्षा चालकांची चौकशी सुरू करण्यात आली असून पोलीस संशयिताला पकडण्याच्या प्रयत्नात आहेत.