अवघ्या तीन दिवसांपूर्वी लग्न झालेले नवदाम्पत्य पाथर्डी तालुक्यातील मढीयेथे देवदर्शनासाठी आले. मात्र दर्शन घेऊन परत जात असतानाच नवरी मुलगी प्रियकरासोबत पळून गेली. हे पलायन नाट्य मात्र देवस्थानच्या सीसीटीव्ही कॅमेऱ्यात कैद झाले आहे.
शेवगाव तालुक्यातील एका युवकाचा तीन दिवसांपूर्वी विवाह झाला होता. नवदाम्पत्य देवदर्शनासाठी मढी येथील कानिफनाथांच्या समाधीच्या दर्शनासाठी दुचाकीवरून आले होते. देवस्थान समितीच्या पार्किंगमध्ये आपली दुचाकी लावून दोघेही नाथांच्या समाधीचे दर्शन घेण्यासाठी मंदिरात गेले. दर्शन घेतल्यानंतर ते मंदिराच्या बाहेर पडले. या जोडप्याच्या मागोमाग विवाहितेचा प्रियकरही होता. देवस्थानच्या वाहनतळावर लावलेली आपली दुचाकी घेण्यासाठी नवरदेव गेला. या संधीचा फायदा उठवत प्रियकराच्या दुचाकीवर बसून नववधूने धूम ठोकली. त्यानंतर पार्किंगमध्ये लावलेली दुचाकी घेऊन नवरदेव आला. त्याने शोधाशोध करूनही त्याला आपली पत्नी न दिसल्याने त्याने आजूबाजूच्या दुकानदाराकडे चौकशी केली. मात्र कोणालाही काही सांगता न आल्याने तो देवस्थान सामितीच्या कार्यालयात आला. आपण पत्नीसह आलो होतो. मात्र ती सापडत नाही, अशी तक्रार त्याने केली. यानंतर देवस्थानमधील कर्मऱ्यांनी सीसीटीव्ही फुटेज तपासल्यावर घडलेला प्रकार समोर आला.
पाठीवर सॅक घेतलेला प्रियकर या जोडप्याच्या मागोमाग चालत आहे. प्रियकर व नवरी मुलगी एकमेकांना खुणा करत आहे. यानंतर दोघांना एका दुचाकीवरून जाताना सीसीटीव्हीने टिपले आहे. या संदर्भात पाथर्डी पोलीस ठाण्यात अद्यापपर्यंत कोणत्याही गुन्ह्याची नोंद झालेली नाही.