मुंब्र्यातून जप्त केलेल्या पाचशे रुपयांच्या बनावट नोटांचे धागेदोरे बेंगळुरूपर्यंत पोहोचले असून बनावट नोटा मुंब्र्यातील एका आरोपीला देणाऱ्या बेंगळुरूच्या किराणा दुकानदाराला मुंब्रा पोलिसांनी अटक केली आहे. २४ मेपर्यंत पोलिस कोठडीत असलेल्या या आरोपीच्या चौकशीतून आणखी काही गोष्टी उजेडात येण्याची शक्यता आहे.
डी. ए. राधाकृष्णन असे बेंगळुरूमधील आरोपीचे नाव असल्याचे पोलिस निरीक्षक जी. एम. मुजावर यांनी सांगितले. शनिवारी सायंकाळी मुंब्रा येथून जसीम उर्फ वसीम सलीम शेख याला अटक करत त्याच्या घरातून पाचशे रुपयांच्या १६४ बनावट नोटा आणि १४ मोबाइल फोन हस्तगत केले होते. या नोटांबाबत पोलिसांनी केलेल्या चौकशीत धक्कादायक माहिती पुढे आली. महिनाभरापूर्वी कलकत्ता येथील हावडा रेल्वे स्थानकावर मोबाइलचोरीच्या प्रकरणात जसीम पकडला गेला होता. हावडा कारागृहात असताना त्याची ओळख इसाक याच्याशी झाली होती. इसाकने बेंगळुरूमधील बिंदरा गावात राहणारा राधाकृष्णन बनावट नोटाविक्रीचा व्यवसाय करत असून त्याची भेट घेतल्यास काही रकमेमध्ये मोठ्या प्रमाणात बनावट नोटा मिळतील अशी माहिती जसीमला दिली.
कारागृहातून सुटल्यानंतर १६ मे रोजी जसीम हा खासगी बसने बिंदरा गावात गेला आणि राधाकृष्णन याच्याकडून ३० हजारामध्ये ५०० रुपयांच्या बनावट नोटा खरेदी केल्याची माहिती जसीमने पोलिस चौकशीत दिली. याप्रकरणी एकूण आरोपींची संख्या दोन झाली असून राधाकृष्णन याचे किरणामालचे दुकान असल्याची माहिती पोलिसांनी दिली. जसीमला बनावट नोटा दिल्याचा आरोप राधाकृष्णन याने फेटाळून लावला असल्याचे पोलिसांचे म्हणणे आहे. मात्र याबाबत सखोल चौकशी सुरु असल्याचेही पोलिसांनी सांगितले.