प्रेयसीला इम्प्रेस करण्यासाठी कोण काय करेल, नेम नाही. मात्र, एका बहाद्दर प्रियकराने तिच्यासाठी चक्क मांजर चोरली. ही मांजरसुद्धा साधीसुधी नाही तर पर्शियन आहे. या मांजरीपायी हे प्रेमीयुगुल थेट गजाआड पोहोचले.
डॉ. अंजुमन सय्यद (४२, रा ताजनगर) असे फिर्यादीचे नाव आहे. हर्षल गजानन मानापुरे (३१, रा. मानकापूर) आणि विलेशा चैत्राम बन्सोड (रा. ताजनगर झोपडपट्टी) अशी आरोपी प्रेमीयुगुलाची नावे आहेत. कॅटरिंगच्या कामातून दोघांचा परिचय झाला. नंतर प्रेमसंबंध निर्माण झाले. ताजनगर परिसरातील एका घरात ‘लिव्ह इन’मध्ये ते राहायचे. विलेशा ही परिसरातून ये-जा करीत असताना डॉ. अंजुमन यांच्याकडे असलेल्या वेगवेगळ्या प्रजातीच्या मांजरी तिला दिसल्या. त्यापैकी एक मांजर तिला खूप आवडली. त्यामुळे तिने हर्षलकडे या मांजरीसाठी हट्ट धरला. हर्षलने त्या मांजरीसंदर्भात चौकशी केली असता ती पर्शियन प्रजातीची मांजर असून तिची बाजारात ३० हजार रुपये किंमत होती. तेवढे पैसे हर्षलकडे नव्हते. त्यामुळे त्याने काहीदिवस टाळाटाळ केली. परंतु, विलेशा हट्टाला पेटली होती. अखेर शुक्रवारी संध्याकाळी त्याने डॉ. अंजुमन यांच्या घरातून मांजर चोरली आणि विलेशाला नेऊन दिली.