श्वान त्यांच्या प्रामाणिकपणासाठी आणि निष्ठेसाठी प्रसिद्ध असतात. अशाच एका श्वानाने आपल्या जीवावर खेळून विषारी नागापासून त्याच्या मालकाचे प्राण वाचवल्याची घटना तामिळनाडूच्या तंजावर जिल्ह्यात घडली आहे. नागाच्या विषारी दंशामुळे या श्वानाचा मात्र काही वेळातच मृत्यू झाला आहे.
तंजावर जिल्ह्यातील वेंकरायापुरम या गावात ही घटना घडली आहे. व्यवसायाने शेतकरी असलेल्या नटराजन यांचा पाळीव श्वान घरात सगळ्यांचाच लाडका होता. रात्री जागून तो शेताची राखण करत असे. काही दिवसांपूर्वी आपल्या पाळीव श्वानाला घेऊन ते शेतात गेले होते. तेव्हा एका कोब्रा नागाने त्यांच्यावर हल्ला केला. तेव्हा नटराजन थोडेसे घाबरले. पण त्यांच्या श्वानाने नागावर हल्ला केला. नागाने त्याला विषारी दंश केला. पण तरीही श्वान मागे हटला नाही. आपल्या जीवाची बाजी लावून त्याने कोब्रा नागाला ठार मारले आणि नटराजन यांचे प्राण वाचवले. पण घरी परतल्यावर काही तासातच या श्वानाचा मृत्यू झाला. कोब्रा नागाचे विष त्याच्या शरीरात भिनल्यामुळे तो जास्त काळ जगू शकला नाही. या श्वानाच्या मृत्यूमुळेच सगळे गावकरी शोकाकूल झाले आहेत.