मध्य रेल्वेवर लोकलमधून प्रवास करणाऱ्या प्रवाशांना आता क्रेडिट-डेबिट (सीडी) कार्डवरून थेट तिकीट काढणे शक्य होणार आहे. मध्य रेल्वेने २२ स्थानकांवरील एटीव्हीएम मशिनमध्ये पीओएस तंत्रज्ञान अंतर्भूत करण्याचा निर्णय घेतला आहे. त्यामुळे क्रेडिट-डेबिट (सीडी) कार्डधारक लाखो प्रवाशांना दिलासा मिळाला आहे.
महानगरांमध्ये क्रेडिट-डेबिट कार्डचा वापर चित्रपटगृहांपासून ते हॉटेलपर्यंत सर्व ठिकाणी केला जातो. या धर्तीवर लोकल तिकीटदेखील क्रेडिट-डेबिट कार्डद्वारे देता येऊ शकेल का, याबाबत चाचपणी करण्यासाठी ‘रेल्वे सूचना प्रणाली केंद्रा’ने (क्रिस) मोहीम हाती घेतली. सुमारे १२ महिन्यांपासून ‘क्रिस’ने याचा पाठपुरावा केला. अखेर एटीव्हीएम मशिनमधील हार्डवेअरमध्ये बदल करून त्यामध्ये पीओएस मशिन तंत्रज्ञान अपग्रेड करण्यात आले. यामुळे सीडी कार्डमधून लोकल तिकीट मिळवण्याचा मार्ग मोकळा झाला.
मुंबई विभागातील २२ स्थानकांवर एकूण ३१ एटीव्हीएममध्ये सीडी कार्ड मशिन कार्यरत करण्यात येणार आहे. यात मध्य आणि हार्बर रेल्वेवरील स्थानकांचा समावेश आहे. त्याशिवाय, पुणे विभागातील पाच स्थानकांवर आठ, सोलापूर विभागातील तीन स्थानकांवर चार, नागपूरमधील पाच स्थानकांवर सहा आणि भुसावळ विभागातील तीन स्थानकांवर तीन एटीव्हीएममध्ये सीडी कार्ड मशिन कार्यन्वित करण्यात येणार आहे. मध्य रेल्वेवर एकूण ५१ सीडी कार्ड मशिन कार्यन्वित होणार आहे.
रेल्वे सूचना प्रणाली केंद्राअंतर्गत एटीव्हीएममध्ये पीओएस मशिन कार्यरत करून त्याची यशस्वी चाचणी घेण्यात आली. यानंतर ही यंत्रणा मध्य रेल्वेकडे सुपूर्द करण्यात आली आहे. सद्यस्थितीत स्थानकातील एटीव्हीएमची देखभाल-दुरुस्ती फोर्ब्स या खासगी कंपनीतर्फे करण्यात येत आहे. सीडी कार्ड मशिन कार्यन्वित झाल्यानंतर त्याची देखभाल-दुरुस्तीही हीच कंपनी करणार असल्याची माहिती रेल्वे अधिकाऱ्यांनी दिली.
तीन सीडी कार्ड मशिन कार्यन्वित होणारी स्थानके
…छत्रपती शिवाजी महाराज टर्मिनस
दोन तीन सीडी कार्ड मशिन कार्यन्वित होणारी स्थानके
घाटकोपर, पनवेल, दादर (मध्य), मुलुंड, कल्याण, ठाणे, डोंबिवली
एक तीन सीडी कार्ड मशिन कार्यन्वित होणारी स्थानके
विक्रोळी, भांडुप, शीव, कांजुरमार्ग, मुंब्रा, बदलापूर, कुर्ला, उल्हासनगर, विद्याविहार, अंबरनाथ, नेरुळ, दिवा, कळवा, खारघर
रेल्वे स्थानकांवर तिकीट खरेदी करण्यासाठी रेल्वे प्रवाशांना आणखी एक नवीन पर्याय लवकरच उपलब्ध होणार आहे. स्थानकातील एटीव्हीएमवर क्रेडिट-डेबिट कार्डवरून लोकल तिकीट आणि पास खरेदी करण्याची चाचणी ‘क्रिस’ने यशस्वी केली आहे. मध्य रेल्वेकडून वर्क ऑर्डर देण्यात आली आहे.