बँक खात्यांची माहिती घेऊन खातेधारकांची फसवणूक करण्याची प्रकरणे वारंवार समोर येत असतानाच, आता भविष्य निधी सभासद व पेन्शनधारकांची फसवणूक करण्याची प्रकरणे समोर येऊ लागली आहे. वृद्ध व्यक्तींना आपल्या जाळ्यात ओढून त्यांच्याकडून आधार, पॅन, बँक खात्यांचे नंबर अशी माहिती विचारली जात आहे. या प्रकरणांतून कोणाचीही फसवणूक होऊ नये, यासाठी कोणतीही माहिती देऊ नये, असे आवाहन भविष्य निर्वाह निधी कार्यालय नाशिक, जळगाव, अहमदनगर यांच्याकडून करण्यात येत आहे.
तंत्रज्ञानाचा फायदे अनेक असले तरी या माध्यमातून फसवणूक होत असल्याची उदाहरणे समोर येत असतात. महिला, वृद्ध व्यक्तींना या प्रकरणांमध्ये फसवण्याचे प्रमाण अधिक असल्याचे दिसून येते. सरकारी, खासगी बँकांकडून आपली गोपनीय माहिती न सांगण्याविषयी वारंवार सूचित करण्यात येत असले तरी अशी प्रकरणे घडतच आहे. हे टाळण्यासाठी कर्मचारी भविष्य निधी कार्यालयाकडून जनजागृती करण्यात येत असून संबंधित कार्यालय कोणत्याही सभासदास फोनवरून यूएएन नंबर, आधार नंबर, पॅन नंबर, अथवा बँक खाते नंबर अशा कोणत्याही प्रकारची माहिती विचारत नसल्याचे सांगण्यात आले आहे. असे फोन आल्यास आपली व्यक्तिगत माहिती, महत्त्वाचे नंबर, पीपीओ नंबर संपर्क केलेल्या व्यक्तीस देऊ नये. दूरध्वनीवरून संपर्क झाल्यावर संबंधित व्यक्तीने माहिती दिल्यास त्याला कर्मचारी भविष्य निधी कार्यालय जबाबदार राहणार नाही, असे त्यांच्याकडून जाहीर करण्यात आले आहे. याविषयी अडचणी नाशिक, जळगाव व अहमदनगर कार्यालयाशी संपर्क साधावा, असे आवाहन करण्यात आले आहे.
येथे साधा संपर्क
नाशिक : ०२५३ – २३६२४१०, २३६०९७४, २३६०९७५
जळगाव : ०२५७ – २२२६८४५
अहमदनगर : ०२४१ – २४११२७३