पाकिस्तानच्या सैनिकांनी शुक्रवारी जम्मू-काश्मीरमधील पूँछ जिल्ह्यातील नियंत्रण रेषेवर केलेल्या हल्ल्यात दोन तरुणींसह तीन भारतीय नागरिक जखमी झाले. नियंत्रण रेषेवरील भारतीय सैन्याच्या चौक्या तसेच नागरिकांना लक्ष्य करीत पाकिस्तानी सैनिकांनी छोट्या तोफांचा मारा तसेच गोळीबार केला. पाकच्या या आगळिकीला भारतीय जवानांनी चोख प्रत्युत्तर दिले.
पूँछ जिल्ह्यातील नियंत्रण रेषेवरील स्वाजियान सेक्टरमध्ये शुक्रवारी सकाळी साडेआठच्या सुमारास पाकिस्तानी सैनिकांनी शस्त्रसंधीचा भंग करीत छोट्या तोफांचा मारा करीत गोळीबारही सुरू केला. पाकिस्तानकडून हा मारा सुरू झाल्यानंतर स्थानिक नागरिकांना घरांतच राहण्याचा सल्ला देण्यात आला आहे, असे लष्कराच्या प्रवक्त्यांनी सांगितले. पाकिस्तानच्या या हल्ल्यात तस्वीर अख्तर (१९) आणि शबिना अख्तर (१८) या दोघींसह तीन जण जखमी झाले. त्यांना रुग्णालयात दाखल करण्यात आले आहे.