कोलकाता नाइट रायडर्सने दिलेल्या १०९ धावांच्या आव्हानाचा चेन्नई सुपर किंग्जने सात गडी राखून फडशा पाडला. कोलकाताचा पराभव करत चेन्नईने गुणतालिकेतलं आपलं अव्वल स्थान कायम राखलं आहे.
चेन्नईने नाणेफेक जिंकून क्षेत्ररक्षणाचा निर्णय घेतला होता. हा निर्णय चेन्नईच्या पथ्यावर पडला कारण कोलकाताच्या संघात एकमेव आंद्रे रसेलने ४४ चेंडूत ५० धावा कुटल्या, इतर सर्व फलंदाजांनी मिळून रसेलइतक्या धावा केल्या तेव्हा कुठे कोलकाताने १०९ धावसंख्येपर्यंत मजल मारली. दीपक चहरने ३ तर हरभजन सिंह आणि इम्रान ताहीरने प्रत्येकी २ गडी बाद केले. रवींद्र जाडेजाने एक विकेट घेतली.
मोठ्या धावसंख्येचं आव्हान नसल्याने चेन्नईसाठी हा विजय तुलनेने सोपा झाला. ड्युप्लेसिसने नाबाद ४३ धावांची दमदार खेळी केली. त्याला रायुडू, शेन वॉटसन रैना आणि केदार जाधव या चौघांनी चांगली साथ दिली.