पुण्यात एका सोसायटीच्या मिटींगमध्ये पाण्यावरून चर्चा सुरू असताना सोसायटीच्या चेअरमनने एका सदस्याला शिवीगाळ करत त्याच्याविरोधात जातीवाचक उद्गार काढल्याची धक्कादायक घटना घडली आहे. याप्रकरणी गुन्हा दाखल करण्यात आला असून अधिक तपास सुरू आहे.
कात्रज येथील भारती विहार सोसायटीमध्ये ३१ मार्चला हा प्रकार घडला. याप्रकरणी विश्वजीत किर्तीकर यांनी ५ एप्रिल रोजी भारती विद्यापीठ पोलीस ठाण्यात हा गुन्हा दाखल केला आहे. सोसायटीच्या बैठकीत जातीवाचक उद्गार काढण्याची ही पहिलीच वेळ नाही. यापूर्वीही वारंवार अशी वक्तव्य करण्यात आली होती. पण आम्ही त्याचा बाऊ केला नाही. आता मात्र प्रकरण हाताबाहेर गेल्यानेच तक्रार करावी लागल्याचं किर्तीकर म्हणाले.
गेल्या दोन महिन्यांपासून सोसायटीत पाण्याचं समान वाटप होत नव्हतं. या सोसायटीचे चेअरमन मिलिंद नारायण पाटील आणि त्याचे मित्र सोसायटीच्या ए आणि बी विंगमध्ये राहतात. त्यांना २४ तास पाणी मिळत असल्याने मी सोसायटीत याबाबत विषय काढला. सोसायटीच्या कारभारावर ताशेरे ओढले असता पाटील यांनी माझ्या कानशीलात लगावली आणि मला लाथाबुक्क्यांनी मारले. एवढे होऊनही मी त्याला प्रत्युत्तर दिले नाही. त्यानंतर पाटील यांनी माझ्या जातीवरून बोलायला सुरुवात केली. तू अनुसुचित जातीतला असून तुला सोसायटीत राहण्याचा अधिकार नाही, असं पाटील मला म्हणाले. हा प्रकार मी सोसायटीतील लोकांना सांगितला असता त्यांनी मला पाठिंबा देत चेअरमनचा निषेध नोंदवणारी बॅनर्स सोसायटी बाहेर लावली. तसेच चेअरमनची हकालपट्टी करण्याची मागणीही त्यांनी केली, असं किर्तीकर म्हणाले.
तर किर्तीकर यांनी सोसायटीतील अन्यायाला वाचा फोडली एवढाच त्यांचा दोष होता. बऱ्याच महिन्यांपासून हा प्रकार सुरू असल्याने कोणीतरी त्यावर बोलायला हवंच होतं. झाला प्रकार मी माझ्या डोळ्यांनी पाहिला असून त्यात किर्तीकर यांची काहीही चूक नसल्याचं स्थानिक रहिवासी सुनील पवार यांनी सांगितलं. दरम्यान, याप्रकरणाचा तपास सुरू असून सोसायटीतील सीसीटीव्ही फुटेज तपासली आहेत. शिवाय साक्षीदारांची साक्ष नोंदवली जात असून अद्यापपर्यंत कुणालाही अटक करण्यात आली नसल्याचं सहाय्यक पोलीस आयुक्त (स्वारगेट विभाग) विश्वेश्वर नांदेडकर यांनी सांगितलं.