पत्नीचा गळा आवळून, तिची हत्या करून, तिने आत्महत्या केल्याचा खोटा बनाव रचणाऱ्या पतीला जन्मठेपेची शिक्षा सुनावण्यात आली. आरोपी पती भारतीय लष्करात लान्सनायक पदावर कार्यरत आहे. अतिरिक्त सत्र न्यायाधीश आर. व्ही. आदोने यांच्या कोर्टाने हा निकाल दिला.
लान्सनायक गंगादत्त लिलाधर तिवारी (रा. घोरपडी लाइन, अयप्पा मंदिरामागे) असे शिक्षा झालेल्या आरोपीचे नाव आहे. त्याने पत्नी रश्मी (वय २९) हिची २० फेब्रुवारी २०१२ रोजी सकाळी राहत्या घरी गळा आवळून हत्या केली होती. या प्रकरणी वानवडी पोलिस ठाण्याचे तत्कालीन पोलिस उपनिरीक्षक परमेश्वर ज्ञानदेव थोरात यांनी फिर्याद दिली होती. या खटल्याचे कामकाज सरकारी वकील लीना पाठक यांनी पाहिले. त्यांनी ११ साक्षीदार तपासले. मयत रश्मीचे नातेवाइक या खटल्यात फितूर झाले. मात्र, वैद्यकीय पुरावा महत्त्वाचा ठरला. प्रकरणाचा तपास करून तत्कालीन वरिष्ठ पोलिस निरीक्षक बाजीराव मोहिते यांनी दोषारोपपत्र सादर केले होते. खटल्याच्या न्यायालयीन कामकाजात पोलिस कॉँस्टेबल पंढरीनाथ पवार यांनी साह्य केले.
तिवारीने अज्ञात कारणावरून चिडून पत्नी रश्मी यांची दोरीने गळा आवळून हत्या केली होती. मात्र, त्यानंतर त्याने पत्नीने आत्महत्या केल्याचा बनाव रचला. हत्या केल्यावर तो बाथरूममधील खिडकीद्वारे बाहेर पडला आणि त्यानंतर दार तोडून पुन्हा घरात आला होता. हा सर्व प्रकार झाल्यानंतर तो त्याच्या तीन वर्षांच्या मुलाला पत्नीच्या मृतदेहाजवळ ठेवून घर बंद करून पसार झाला होता. जातांना त्याने एका सहकाऱ्याला फोन करून, ‘माझ्या पत्नीने आत्महत्या केली असून, मी बोलण्याच्या मनस्थित नसल्याने निघून जात आहे,’ असा निरोप दिला होता. घटनेच्या दोन-तीन दिवसांतच पोलिसांनी त्याला अटक केली होती.