उज्ज्वला योजनेअंतर्गत एलपीजी सिलेंडर सवलतीच्या दरात गरिबांना सिलेंडर दिल्यानंतर आता प्रतिकिलोच्या दराने सिलेंडर देणार असल्याची माहिती पेट्रोलियम मंत्री धर्मेंद्र प्रधान यांनी दिली आहे. याशिवाय सिलेंडर विकत घेऊन चार हफ्त्यांमध्ये त्याची किंमत चुकती करण्याची सुविधाही गरिबांना उपलब्ध करून देणार असल्याचं त्यांनी सांगितलं आहे.
उज्ज्वला योजनेअंतर्गत देशातील कोट्यवधी गरिबांपर्यंत सवलतीच्या दरात सिलेंडर पोहोचवण्यात आले आहेत. एकट्या उत्तर प्रदेशातील १.६ कोटी लोकांनी या योजनेचा आतापर्यंत थेट लाभ घेतला आहे. पण लाभार्थींपैकी २० टक्के ग्राहक सवलतीच्या दरातील रक्कमही एकहाती भरू शकत नाहीत. त्यामुळेच त्यांना प्रतिकिलोने गॅस देण्याची तसेचं चार हफ्त्यांमध्ये सिलेंडरची किंमत चुकवण्याची सुविधा देण्यात येणार आहे. उत्तर प्रदेशात ही सुविधा यशस्वी झाल्यास ती देशभर लागू करण्यात येणार आहे. देशातील प्रत्येक गरिबाच्या घरी सिलेंडर पोहोचावण्याच्या महत्त्वाकांक्षी धोरणाअंतर्गत उज्ज्वला योजना राबवली जाते आहे.