दुसरी मुलगी होण्याच्या भीतीने विवाहितेचा जबरदस्तीने गर्भपात केल्याप्रकरणी सासरच्या लोकांवर गुन्हा दाखल करण्यात आला आहे. वाकड पोलिस ठाण्यात २७ वर्षीय पीडितेने दिलेल्या फिर्यादीवरून पती, सासू, सासरा आणि दिरावर कौटुंबिक हिंसाचार, बालहत्या, विनयभंग आणि मारहाणीचा गुन्हा दाखल करण्यात आला आहे.
पोलिसांनी दिलेल्या माहितीनुसार, पीडित महिलेला पहिली मुलगी आहे. त्यामुळे सासरचे सर्वजण तिच्यावर नाराज आहेत. पती मागील काही दिवसांपासून किरकोळ कारणांवरून तिच्याशी भांडण करू लागला. या भांडणाचे रूपांतर शारीरिक आणि मानसिक त्रास देण्यात झाले. दरम्यान, पीडित महिला पुन्हा गर्भवती राहिली. दुसऱ्या वेळीही मुलगीच होणार अशी भीती पती आणि सासरच्या मंडळींना होती. त्यामुळे पतीने तिला जबरदस्तीने गर्भपात करण्यास भाग पाडले. यामुळे महिलेचे मानसिक खच्चीकरण झाले. तसेच तिला कधीही मुलगा होणार नसल्याचे गृहीत धरून सासरच्या मंडळींनी पतीचा दुसरा विवाह लावला. या विवाहास तिची संमती नव्हती. तिच्यावर घटस्फोट घेण्यासाठी दबाव आणण्यात आला. दिराने तिचा विनयभंगही केला. पीडितेचा पती राजकीय पक्षाचा पदाधिकारी असून, त्यामुळे पोलिसांकडून कारवाईस उशीर होत असल्याचे पीडितेने म्हणणे आहे. फौजदार संगीता गोडे तपास करीत आहेत.