रेल्वेत तुम्हाला दर्जेदार जेवण मिळणार आहे. मात्र, त्यासाठी जेवणाच्या प्रमाणाशी तडजो़ड करावी लागणार आहे. जेवण दर्जेदार हवे असेल तर प्रवाशांना कमी प्रमाणात जेवण मिळणार आहे. राजधानी आणि शताब्दी एक्स्प्रेससारख्या प्रीमियम गाड्यांपासून या प्रयोगाची सुरूवात होणार आहे. या नव्या प्रयोगामुळे रेल्वेत मिळणाऱ्या जेवणात किमान १५० ग्रॅम घट होणार आहे.
रेल्वेत मिळणाऱ्या जेवणाच्या दर्जाच्या तक्रारी दूर करण्यासाठी आयआरसीटीसी प्रयत्न करत आहे. आयआरसीटीसीने तयार केलेल्या नव्या प्रस्तावानुसार, सूप, ब्रेड स्टिक्स, बटर आणि सँडविचसारखे पदार्थ मेनूमधून वगळण्यात येणार आहे. त्याशिवाय प्रवाशांना संपूर्ण जेवण देण्याऐवजी शाकाहारी किंवा मासांहारी जेवणात राईस कॉम्बो देण्याचा प्रस्ताव आहे. कॅटरिंग तज्ञांच्या एका पॅनलने आयआरसीटीला दिलेल्या माहितीनुसार, सध्या प्रवाशांना देण्यात येणारे जेवण हे ९०० ग्रॅमपर्यंत असते. तर, सामान्य भारतीयाचे डाएट ७५० ग्रॅमपर्यंत असते. या अतिरिक्त जेवणामुळे आयआरसीटीला आर्थिक नुकसान सहन करावे लागत होते. सध्या एक थाळी ११२ रुपयांना आहे. ज्याची किंमतही १५० रुपयांहून अधिक आहे. जेवणात मिळणारी डाळ १५० ग्रॅम मिळेल. तर, चिकनऐवजी १५० ग्रॅम बोनलेस चिकन ग्रेवी देण्याचा प्रस्ताव आहे. त्याशिवाय जेवणाच्या पॅकेजिंगमध्येही बदल करण्यात येणार आहे.
प्रवाशांना रेल्वेत मिळणाऱ्या जेवणांचा दर्जा टिकवणे आव्हानात्मक असल्याचे एका रेल्वे अधिकाऱ्याने म्हटले. दर्जेदार जेवण आणि आर्थिक गणित जुळवण्यासाठी हा नवा प्रस्ताव तयार करण्यात आली असल्याची माहिती अधिकाऱ्याने दिली. रेल्वे बोर्डाने हा प्रस्ताव मान्य केल्यास सुरुवातीला २७ राजधानी, शताब्दी एक्स्प्रेस गाड्यांमध्ये याची अंमलबजावणी होणार आहे.