अलाहाबाद येथून सुमारे साडेपाचशे पोलीस बेपत्ता झाल्याची धक्कादायक माहिती उजेडात आली आहे. विशेष म्हणजे बेपत्ता झालेल्या या पोलिसांना नियमित पगार मिळत असल्याचंही उघड झाल्याने खळबळ उडाली आहे.
अलाहाबादच्या एसएसपीने केलेल्या ‘मॅन पॉवर ऑडिट’मधून ही माहिती उजेडात आली आहे. ड्युटीवर असताना सुमारे साडेपाचशे पोलीस बेपत्ता झाले आहेत. त्यांना पगारही देण्यात येत असल्याची माहिती ऑडिटमधून उजेडात आली आहे. याप्रकरणी अधिक चौकशी सुरू आहे.
अलाहाबाद जिल्ह्यातील ३९ पोलीस ठाण्यात सध्या साडे पाच हजार गैरराजपत्रित कर्मचारी तैनात आहेत. या पोलीस कर्मचाऱ्यांचे ऑडिट करण्यात आले असता त्यातून ही बाब समोर आली आहे. स्मार्ट ई-अॅप्लिकेशनद्वारे हे ऑडिट करण्यात येत आहे. या सॉफ्टवेअरमध्ये पोलिसांचा संपूर्ण लेखाजोखा ठेवण्यात येत आहे. विशेष म्हणजे हे सॉफ्टवेअर लावल्यानंतर अनेक धक्कादायक बाबीही समोर आल्या आहेत. साडेपाचशेहून अधिक पोलीस शिपाई, हवालदार आणि पोलीस निरीक्षकांच्या पोस्टिंगची काहीच माहिती मिळत नसून त्यांचा पगार मात्र नियमित सुरू असल्याचं उघड झाल्यानं खळबळ उडाली आहे.