कोथरूड, कर्वेनगर परिसरातून ‘पॉकेटमनी’साठी महागड्या सायकली चोरून त्या विकणाऱ्या उच्चभ्रू कुटुंबातील एका विद्यार्थ्यासह दोन मुलांना अलंकार पोलिसांनी पकडले आहे. विद्यार्थ्याने चोरलेली सायकल विकून त्याचे पैसे चित्रपट पाहण्यासाठी व मित्रांना महागड्या हॉटेलमध्ये कॉफी पाजण्यावर उडविल्याचे समोर आले आहे.
सायकल चोरणाऱ्या १६ वर्षीय विद्यार्थ्याला आणि सायकली विकत घेणाऱ्या १७ वर्षीय मुलाला अलंकार पोलिसांनी ताब्यात घेतले आहे. त्यांच्यावर अलंकार पोलिस ठाण्यात गुन्हा दाखल करण्यात आला आहे. कोथरूड, अलंकार तसेच शहरातील विविध भागांतून महागड्या सायकली आणि दुचाकी चोरीचे प्रमाण वाढले आहे. अलंकार पोलिस या चोरट्यांचा माग काढत होते. त्या वेळी कर्मचारी जावेद शेख व दशरथ कर्णे यांना बातमीदारामार्फत माहिती मिळाली की, एक मुलगा सायकली चोरून विकत आहे. त्यानुसार, वरिष्ठ पोलिस निरीक्षक रेखा साळुंखे यांच्या पथकाने या मुलाला पकडले. त्याच्याकडे चौकशी केली असता त्याने सायकल चोरल्याची माहिती दिली. त्यानुसार त्याला ताब्यात घेऊन अधिक चौकशी केली असता त्याने गियरची महागडी सायकल चोरून ती त्याच्याच मित्राला केवळ सात हजार रुपयांना विकल्याचे सांगितले. त्यानुसार पोलिसांनी त्याच्या मित्रालाही ताब्यात घेतले. तो आणखी एक सायकल ओएलएक्सवर विक्री करण्याच्या तयारीत होता. तर, चोरीची दुचाकी त्याने स्वत:च्या वापरासाठी ठेवली होती.
ही दुचाकी घरी आल्यानंतर तो घराच्या पाठीमागील गल्लीत पार्क करून ठेवत होता. त्याने सायकल विक्रीतून मिळालेले पैसे मौजमजेसाठी घालविले. या पैशांतून चित्रपट पाहिले आहेत तसेच मित्रांना महागड्या हॉटेलात कॉफी ट्रीट दिली आहे. या सायकलचोर मुलाने नुकतीच दहावीची परीक्षा दिली आहे. मुलगा सायकल चोरी करत असल्याचे समजल्यानंतर कुटुंबीयांना धक्का बसला. त्याच्याकडून सायकल विकत घेणारा मुलगा त्याचाच मित्र आहे. त्याने शाळा सोडली असून त्याचे कोथरूड परिसरात दुकान असल्याचे पोलिसांकडून सांगण्यात आले आहे.