सध्या राज्यात रेशन दुकानांवर विकण्यात येणाऱ्या तूरडाळीचा भाव किलोमागे २० रुपयांनी कमी करण्याचा निर्णय राज्य मंत्रिमंडळाने घेतला आहे. त्यामुळे रेशनच्या कार्डधारकांना आता ५५ रुपयांऐवजी ३५ रुपये प्रतिकिलो दराने तूर डाळ मिळणार असल्याचे सरकारतर्फे सांगण्यात आले.
दक्षिणेतील कर्नाटक व तमिळनाडू राज्यात रेशनिंग व्यवस्थेतील दुकानांवर तूर डाळ अनुक्रमे ३८ आणि ३० रुपये प्रतिकिलो दराने विकली जात आहे. महाराष्ट्रातही यंदा तुरीचे विक्रमी उत्पादन झाले असून, शेतकऱ्यांचे आर्थिक हित जोपासण्यासाठी सरकारने तूरडाळ खरेदीत हस्तक्षेप योजना सुरू केली आहे. शेतकऱ्यांना मदत करण्याबरोबरच स्वस्त दरात ग्राहकांना तूरडाळ उपलब्ध करून देण्याचा निर्णय मंत्रिमंडळाने घेतला आहे.
राज्यातील ग्राहकांच्या हितासाठी रेशनिंगवरील स्वस्त धान्य दुकानातून सध्या विक्री करण्यात येत असलेल्या तूरडाळीच्या प्रति किलो ५५ रुपयांच्या दरात सुधारणा करण्यात आली असून, आता प्रतिकिलो ३५ रुपयांप्रमाणे विक्री करण्यास राज्य मंत्रिमंडळाच्या बैठकीत मान्यता देण्यात आली. रेशनिंगप्रमाणेच शासनाचे सार्वजनिक उपक्रम, स्थानिक स्वराज्य संस्था, पूर्णतः अथवा अंशतः अनुदानित संस्था याद्वारे होणारी तूरडाळीची खरेदी पुढील आदेश होईपर्यंत फक्त महाराष्ट्र राज्य पणन महासंघाकडून शासकीय दराने करण्यास बंधनकारक करण्यात आली आहे.