पेट्रोल-डिझेलच्या किंमती कमी करून सर्वसामान्यांना दिलासा देण्याचे आश्वासन सरकारने दिले असले तरी, दर वाढतच आहेत. सलग अकराव्या दिवशी पेट्रोल दरवाढ झाली आहे. मुंबईत पेट्रोल ८५.२९ रुपये प्रतिलिटर आहे.
इंडियन ऑइल कंपनीच्या माहितीनुसार, मुंबईत गुरुवारी पेट्रोल ८५.२९ रुपये प्रतिलिटरने मिळत आहे. दिल्लीत ७७.४७ रुपये, कोलकातामध्ये ८०.१२ रुपये, तर चेन्नईत ८०.४२ रुपये प्रतिलिटर आहे. तर मुंबईत डिझेल ७२.९६ रुपये, दिल्लीत दर ६८ रुपयांच्या पलीकडे पोहोचले आहेत.
पेट्रोल-डिझेलच्या वाढत्या किंमतींमुळे मोदी सरकारविरोधात संताप व्यक्त करण्यात येत आहे. दर कमी करून सर्वसामान्यांना दिलासा देण्याचे आश्वासन सरकारने बुधवारी दिले होते. मात्र, दरवाढ सुरूच आहे. दरम्यान, कर्नाटक विधानसभा निवडणुकीदरम्यान १९ दिवस पेट्रोल-डिझेलची दरवाढ केली नव्हती. मात्र, मतदानानंतर किंमती वाढवण्यात आल्या. तेव्हापासून दर चढेच आहेत. आंतरराष्ट्रीय बाजारात कच्च्या तेलाच्या वाढत्या किंमती हे पेट्रोल-डिझेल दरवाढीचे प्रमुख कारण असल्याचे सांगण्यात येते.