भाजपा खासदार आणि माजी केंद्रीय मंत्री बंडारु दत्तात्रय यांचा २१ वर्षीय मुलगा वैष्णव याचं हृदयविकाराच्या झटक्यानं निधन झालं आहे. रात्रीच्या जेवणानंतर वैष्णव याच्या छातीत अचानक दुखू लागल्यानं त्याला सिकंदराबादमधल्या गुरुनानक रुग्णालयात दाखल करण्यात आलं होतं. मात्र, बुधवारी उपचारादरम्यान त्याचं निधन झालं. वैष्णव एमबीबीएसच्या तृतीय वर्षात शिकत होता.
बंडारु दत्तात्रय हे माजी पंतप्रधान अटल बिहारी वाजपेयी सरकारमध्ये मंत्री होते. त्यांचा कार्यकाळात त्यांनी देशातील विविध भागात रोजगार मेळाव्याचे आयोजन केले होते. दक्षिण भारतातल्या राजकारणात बंडारू दत्तात्रेय यांची वेगळी ओळख आहे. बंडारु दत्तात्रय तेलंगणातल्या सिकंदराबादेतून खासदार असून मोदी सरकारमध्ये बंडारु दत्तात्रय हे २०१४ पासून १ सप्टेंबर २०१७ पर्यंत कामगार मंत्री होते.