आयपीएलच्या अंतिम सामन्याचं समालोचन पहिल्यांदाच मराठीत होणार आहे. विशेष म्हणजे, ‘धक धक गर्ल’ माधुरी दीक्षित आणि मराठी सिनेसृष्टीतला ‘चॉकलेट बॉय’ स्वप्नील जोशी हे समालोचनाची जबाबदारी सांभाळणार आहेत.
सध्या देशभरात आयपीएलचं वारं वाहत असून येत्या २७ मे रोजी अंतिम सामना रंगणार आहे. यात कोण बाजी मारणार याबद्दल देशातील तमाम क्रिकेटप्रेमींना उत्सुकता आहे. मराठी क्रिकेटप्रेमींसाठी हा सामना आणखी खास असणार आहे. कारण, त्यांना सामन्याचं संपूर्ण वर्णन मायमराठीत ऐकायला मिळेल. मराठी माणसाचं आणि क्रिकेटचं एक वेगळंच नातं आहे. विजय मर्चंटपासून सचिन तेंडुलकरपर्यंत अनेकांनी महाराष्ट्र व मराठी माणसाला जगात सन्मान मिळवून दिला आहे. असं असलं क्रिकेट समालोचनात मराठी क्वचितच दिसली आहे. आयपीएलच्या अंतिम सामन्यात मात्र वेगळं चित्र दिसणार आहे.
मराठीत क्रिकेट समालोचन करण्यासाठी मी अत्यंत उत्सुक आहे, अशी प्रतिक्रिया स्वप्नील जोशीनं व्यक्त केली आहे. माधुरी, स्वप्नीलसोबत क्रिकेटपटू चंद्रकांत पंडित, संदीप पाटील आणि क्रिकेट विश्लेषक सुनंदन लेले हेही समालोचनात सहभागी होणार आहेत. अंतिम सामना सुरू होण्याआधी, म्हणजेच सहा वाजल्यापासून हा खास कार्यक्रम सुरू होणार आहे. ‘स्टार प्रवाह’ अंतिम सामन्याचं प्रक्षेपण होणार असून तिथं मराठी समालोचन ऐकायला मिळेल