चालकाचे नियंत्रण सुटल्याने कार ग्रेड सेपरेटरमध्ये पिलरला धडकून पिंपरीत रविवारी पहाटे भीषण अपघात झाला. या अपघातात एकाचा जागीच मृत्यू झाला असून एकजण गंभीर जखमी झाला आहे. शिवम जाधव (वय २१) असे अपघातात मृत्यू झालेल्या तरुणाचे नाव आहे. तर हृषीकेश पवार गंभीर जखमी झाला असून त्याला जवळच्या रुग्णालयात उपचारासाठी दाखल करण्यात आले आहे.
आज पहाटे पाचच्या सुमारास मुंबईकडून पुण्याच्या दिशेने एक मारुती एस एक्स ४ (एम एच ०४ / ए डी ८४६१) कार भरधाव वेगात जात होती. कार पिंपरी ग्रेडसेपरेजटजवळ आली असता, चालकाचे कारवरील नियंत्रण सुटले. त्यामुळे कार रस्त्याच्या दुभाजकावरील पोलला धडकली. कार वेगात असल्याने कार दुभाजकावरून सुमारे ५०० मीटरपर्यंत घसरत गेली. या अपघातामध्ये चालकाचा जागीच मृत्यू झाला. तर त्याच्यासोबत असलेला त्याचा आतेभाऊ हृषीकेश गंभीर जखमी झाला आहे. या घटनेनंतर संत तुकाराम नगर अग्निशमन विभागाचे जवान तात्काळ घटनास्थळी दाखल झाले. गाडी कापून कारमध्ये अडकलेल्या दोघांना बाहेर काढण्यात आले असून जखमी तरुणाला जवळच्या रुग्णालयात उपचारासाठी दाखल करण्यात आले आहे. याप्रकरणी पोलिसांनी गुन्हा नोंदविला असून अधिक तपास सुरू आहे.