कर्जाच्या डोंगरात अडकलेल्या पोलिस शिपायाचे वेतन न मिळाल्याने पर्याय म्हणून त्याने सरकारी गणवेशात भीक मागण्याची परवानगी परवानगी वरिष्ठांकडे केली आहे! मुंबई पोलिस दलातील ज्ञानेश्वर अहिरराव यांनी पत्रातून केलेल्या मागणीने सारेच अवाक् झाले आहेत. मार्चमध्ये पत्नीच्या आजारपणासाठी तीन दिवस सुट्टीवर गेलेल्या अहिरराव यांचे नंतरचे मासिक वेतन वेळेत न आल्याने त्यांची आर्थिक कोंडी झाली आहे. त्यासाठीच त्यांनी पत्रातून भीक मागण्यास परवानगी द्यावी, असे पत्रात म्हटले आहे.
मुंबई पोलिस दलातील ज्ञानेश्वर अहिरराव यांची नियुक्ती वांद्रे येथील मातोश्री बंगल्यावर सुरक्षा बंदोबस्तावर आहे. २० ते २२ मार्च २०१८ या काळात पत्नीचा पाय फ्रॅक्चर झाल्याने ते गावी गेले होते. त्याविषयी त्यांनी मरोळ येथील आपल्या कार्यालयात त्याची माहितीही दिली होती. संदेश दिल्यानंतर ते पत्नीवरील उपचारासाठी गावी गेले होते. २८ मार्च रोजी ते पुन्हा सेवेत रुजू आले. अहिरराव यांनी घेतलेल्या कर्जापोटी त्यांच्या वेतनातून काही रक्कम कापली जाते. त्यांच्या कुटुंबात आई, वडील, पत्नी व मुलगी असून कर्जाच्या परतफेडीसाठी त्यांना मासिक वेतन दर वेळेत मिळणे गरजेचे आहे. परंतु त्यांना वेतन न मिळाल्याने मोठी आर्थिक कोंडी झाल्याचे अहिरराव यांचे म्हणणे आहे.
कर्जावरील व्याज आणि दंड असा दुहेरी फटका बसल्याने कुटुंबाचे हाल झाल होत असल्याचा पत्राचा रोख आहे. त्यातून मार्ग निघत नसल्याने त्यांनी ८ मे रोजी पोलिस उपायुक्तांना अर्ज करून सरकारी गणवेशात भीक मागण्याची परवानगी देण्याची विनंती केली आहे. या अर्जासोबत त्यांनी पुराव्यादाखल पत्नीच्या आजारपणाची कागदपत्रेही जोडली आहेत. या अर्जाच्या प्रती त्यांनी राज्यपाल, मुख्यमंत्री, पोलिस आयुक्तांनाही पाठवल्या आहेत. याबाबत, वरिष्ठ पोलिस अधिकाऱ्यांनी ही प्रशासकीय बाब असल्याचे मत व्यक्त केले आहे.