मुंबई पोलिस दलातील शिपाई पदासाठी भरती प्रक्रिया सुरू असतानाच रेल्वे पोलिसांची भरती प्रक्रिया आज, गुरुवारी संपुष्टात येणार आहे. रेल्वे पोलिसांतील २८० शिपाई पदांसाठी भरतीसाठी तब्बल ६० हजारांहून अधिक अर्ज दाखल झाले आहेत. त्यातील ३५ हजार इच्छुक उमेदवारांनी शारीरिक चाचणीत सहभाग घेतला. गुरुवारी शेवटच्या दिवशी या भरतीसाठी नेमके किती उमेदवार येतात याकडे लक्ष लागले आहे.
मुंबई पोलिस दलातील शिपाई आणि रेल्वे पोलिसांतील शिपाई पदांसाठी स्वतंत्रपणे भरती राबवली जाते. रेल्वे आणि मुंबई पोलिसांचा भाग असला तरीही त्यातील शिपाई पदांची भरती ही पूर्वीपासून वेगळी आहे. रेल्वे पोलिस दलातील अधिकारी वर्ग हा मुंबई पोलिसांचा भाग असतो. त्याचप्रमाणे वरच्या श्रेणीतील अधिकारी वर्गही मुंबई पोलिसांचा अंतर्गत येतात. पण रेल्वे पोलिस शिपाई श्रेणीची भरती पूर्णपणे वेगळी आहे. मुंबई पोलिस वा अन्य सरकारी यंत्रणेतील भरतीप्रमाणेच रेल्वे पोलिस दलात शिपाई म्हणूनही इच्छुक उमेदवारांची संख्या मोठ्या प्रमाणावर असते. यंदा २९८ पदांसाठी ६० हजारांहून अधिक अर्ज दाखल झाले आहेत. पण त्यातील ३५ हजार उमेदवारांनी प्रत्यक्ष उमेदवारीसाठी शारीरिक चाचणीसाठी सहभाग घेतल्याचे सांगण्यात येते. आधी जाहीर केलेल्या तारखेनुसार आज, गुरुवारी भरतीचा शेवटचा दिवस आहे. पण त्यासाठी उर्वरित २५ हजार इच्छुक उमेदवारांपैकी किती उमेदवार येतील याकडे लक्ष लागले आहे.
या भरतीसाठी ११ ते १२ मे रोजी आणखी दोन दिवस मुदतवाढ मिळणार असल्याचे सांगण्यात येते. त्यामुळे काही कारणांनी ही परीक्षा देउ न शकणाऱ्या उमेदवारांना संधी मिळेल, असे सांगण्यात येते.