फसवणुकीच्या गुन्ह्यात जेलमध्ये असलेला तो खटल्याच्या निकालाची वाट पाहत होता..आजारी असल्यामुळे त्याला ससूनमध्ये दाखल करण्यात आले होते.. त्याची खटल्यात निर्दोष मुक्तता करण्यात आली त्याच दिवशी त्याचा मृत्यू झाला.. जेलच्या बाहेर येण्याचे त्याचे स्वप्न अधुरे राहिले.
फॉर्चुन ओग्बेहासे असे त्याचे नाव होते. हा आरोपी २० जुलै २०१७ पासून खडकी पोलिस स्टेशनमध्ये दाखल असलेल्या फसवणुकीच्या गुन्ह्यात येरवडा जेलमध्ये होता.
त्याला २४ एप्रिल २०१८ रोजी जेल मुख्य वैद्यकीय अधिकारी यांच्या सल्ल्यानुसार वैद्यकीय उपचारांसाठी ससून येथे दाखल करण्यात आले होते. या आरोपीसह इतर तीन आरोपींवर दोषारोपपत्र दाखल होऊन या खटल्यासह इतर एका गुन्ह्यातून निर्दोष मुक्तता करण्यात आली. तर, हिंजवडी पोलिस स्टेशनच्या एका गुन्ह्यात जामिनावर मुक्तता करण्याचा आदेश देण्यात आला होता. ४ मे रोजी आरोपीची फसवणुकीच्या खटल्यातून मुक्तता करण्यात आल्याचा निकाल खडकी कोर्टाने दिला. त्याच दिवशी आरोपी फॉर्चुन याचा सायंकाळी चार वाजता ससूनमध्ये मृत्यू झाला. जेलच्या बाहेर पडण्याचे त्याचे स्वप्न मात्र अधुरेच राहिले, अशी प्रतिक्रिया त्याचे वकिल अॅड. श्रीकृष्ण घुगे यांनी दिली.