संगीताच्या वेडापायी अनेकजण कानाला हेडफोन लावून गाणी ऐकता ऐकता झोपतात. पण असं करणं कधी तरी महागातही पडू शकतं. चेन्नईतही कानाला हेडफोन लावून झोपणं एका महिलेच्या जीवावर बेतल्याचं उघडकीस आलं आहे. फातिमा नावाची ही महिला कानाला हेडफोन लावून झोपली होती, मात्र करंट लागल्यानं तिचा मृत्यू झाल्याचं उघडकीस आलं आहे.
कंथूर येथे रविवारी ही घटना घडली. फातिमाचा नवरा तिला सकाळी उठवायला गेला. पण ती उठली नाही. त्यामुळे त्याला संशय आला आणि त्याने आरडाओरड केली. त्यानंतर शेजाऱ्यांच्या मदतीने फातिमाला रुग्णालयात नेले असता ती मृत झाल्याचं घोषित करण्यात आलं. शनिवारी रात्री फातिमा हेडफोन लावून झोपली होती. त्यामुळे शॉर्ट सर्किट होऊन तिला करंट लागला असावा आणि त्यातच तिचा मृत्यू झाला असावा, असा अंदाज पोलिसांनी वर्तवला आहे. दरम्यान, याबाबत पोलिसांनी अधिक तपास सुरू केला आहे.