मराठी रंगभूमीवर मैलाचा दगड ठरलेल्या ‘मोरुची मावशी’ या नाटकाचे दिग्दर्शक आणि ज्येष्ठ रंगकर्मी दिलीप कोल्हटकर यांचं आज प्रदीर्घ आजारानं पुण्यात निधन झालं. ते ७२ वर्षाचे होते. त्यांच्यामागे एक मुलगा आणि मुलगी असा परिवार आहे. त्यांचा मुलगा सध्या अमेरिकेत असतो.
दिलीप कोल्हटकर गेल्या काही दिवसांपासून आजारी होते. पुण्यातील दीनानाथ मंगेशकर रुग्णालयात त्यांच्यावर उपचार सुरू होते. आज सकाळी ८ वाजून ३० मिनिटांनी त्यांची प्राणज्योत मालवली. कोल्हटकर यांची पत्नी दीपाली कोल्हटकर यांची तीन महिन्यापूर्वी हत्या झाली होती. घरातील नोकरानेच त्यांच्या पत्नीची हत्या केल्याचं उघड झालं होतं. या धक्क्यातून कोल्हटकर सावरले नव्हते. आज प्रदीर्घ आजाराने त्यांचे निधन झाले.
अभिनेते आणि दिग्दर्शक म्हणून मराठी रंगभूमीवर त्यांनी ठसा उमटविला होता. त्यांनी ‘पार्टी’ या हिंदी सिनेमात अभिनय केला होता. तर ‘शेजारी शेजारी’ आणि ‘ताईच्या बांगड्या’ या मराठी चित्रपटाचं दिग्दर्शन केलं होतं. ‘चिमणराव गुंड्याभाऊ’ या मराठी चित्रपटातही त्यांनी अभिनय केला होता. प्रायोगिक व व्यावसायिक रंगभूमीवरील मुशाफिरीत त्यांनी अनेक लोकप्रिय नाटकांचे दिग्दर्शन केले. त्यांची ‘कवडी चुंबक’, ‘राजाचा खेळ’, ‘मोरुची मावशी’, ‘बिघडले स्वर्गाचे दार’ ही नाटकं विशेष गाजली. त्यांच्या निधनामुळे रंगभूमी ज्येष्ठ आणि प्रतिभावंत रंगकर्मीला मुकल्याची भावना व्यक्त होत आहे.