जबरी चोरी, सोनसाखळी खेचणाऱ्या तरुणांच्या टोळीसह एक सराईत सोनसाखळी चोर अशा एकूण आठ आरोपींना गुन्हे शाखेच्या भिवंडी युनिटने अटक करून एकूण ८ लाख १५ हजार ४४० रुपयांचा मुद्देमाल हस्तगत करण्यात आला आहे. यातील तीन आरोपी कोल्हापूरचे असून आरोपींच्या चौकशीत एकूण २५ गुन्ह्यांची उकल झालेली आहे.
वरिष्ठ पोलिस निरीक्षक शीतल राऊत यांच्या पथकाने विजय नायर (२४) याला अटक केली. हा आरोपी इतर सहकाऱ्याच्या मदतीने मोटारसायकल चालकांना लुटत असून आठ जणांच्या या टोळीने भिवंडी, कोल्हापूरमध्ये गुन्हे केल्याची बाब निष्पन्न झाली. त्यानुसार कुणाल घुले (२१), शिवगणेश तेवर (२२), दिलशाद अन्सारी (२१), गणेश वेमुला (२६) यांना भिवंडीतून तर गणेश वेमुला (२६), अश्विन डांगे (२५), अरुण औरसंग (२२) या तिघा इचलकरंजीमधून अटक करण्यात आले. तर मोबीन उर्फ मोगली बागवान याचा मृत्यू झाला आहे. या टोळीने भिवंडीसह इचलकरंजीमध्ये ७ दरोडे आणि ३ जबरी चोरी आणि एक दुखापत असा एकूण ११ गुन्हे केले आहेत.