‘आपले संबंध पुन्हा कधीही जुळू शकणार नाहीत, इतपत तुटलेले आहेत. आपल्यात पुन्हा कधीही समेट घडू शकत नाही. ही बाब तू स्वत:ही मान्य केलेली आहेस’, असे नमूद करत इंद्राणी मुखर्जीने पती पीटर मुखर्जीला घटस्फोट मागण्यासाठी कायदेशीर नोटीस पाठवली आहे.
शीना बोरा हत्याकांड प्रकरणात हे दोघेही मुख्य आरोपी आहेत. इंद्राणी (४६) सध्या भायखळा महिला तुरुंगात आहे तर पीटर (६४) हा आर्थर रोड तुरुंगात आहे. त्यांच्यासह अन्य आरोपींविरोधात खटला सुरू आहे.
इंद्राणीने आपल्या वकिलामार्फत २५ एप्रिल रोजी ही नोटीस पाठवली आहे. त्यात ३० एप्रिलपूर्वी आर्थिक तडजोडीच्या माध्यमातून सामंजस्याने घटस्फोट देण्यास तयार असशील तर तशी कायदेशीर प्रक्रिया सुरू करता येईल, असेही नमूद करण्यात आले आहे.
शीना ही इंद्राणीची आधीच्या एका पतीपासून झालेली मुलगी होती. इंद्राणीने कट रचून एप्रिल २०१२मध्ये तिची हत्या केली आणि त्यात पीटरबरोबरच आधीचा पती संजीव खन्ना आणि ड्रायव्हर श्यामवर राय यांची मदत घेतली, असा आरोप आहे.