आंब्याचा मोसम सुरू झाला की, अनेक प्रकारचे हापूस आंबे बाजारात दिसू लागतात. यात अस्सल हापूस आंबा दडपला जातो. त्यामुळे आंबाप्रेमींसह आंबाउत्पादकांच्या तोंडालाही पाने पुसली जातात. आता मात्र हा संभ्रम संपुष्टात येणार आहे. कोकणातल्या पाचही जिल्ह्यांतील हापूस आंब्याला हापूस हेच नाव राखीव करण्याची प्रक्रिया सुरू झाली आहे. गुरुवारी मुंबईत झालेल्या बैठकीत कंट्रोलर जनरल ऑफ पेटंट यांनी तसे स्पष्ट संकेत दिले आहे. कोकणच्या आंब्याला त्यामुळे संरक्षण मिळणार आहे.
मागील काही वर्षांत देवगड तसेच रत्नागिरी हापूसला वलसाड, धारवाड, कर्नाटकी, पक्का हापूस अशा विविध आंब्याशी दोन हात करावे लागत होते. परराज्यामध्ये आंबा तुलनेने स्वस्त असल्याने हापूसच्या नावाखाली वाट्टेल ते फळ विकण्याचा उद्योग सुरू होता. कंट्रोलर जनरल ऑफ पेटंट यांच्या निर्देशामुळे आता कोकणच्या हापूस आंब्याला आंतरराष्ट्रीय पातळीवर स्वतःची हक्काची बाजारपेठ निर्माण करता येईल, असे मत कोकण हापूस उत्पादक व विक्रेता सहकारी संस्थेचे अध्यक्ष डॉ. विवेक भिडे यांनी व्यक्त केले. कमी दरात हापूस असल्याचा दावा करणारे व्यापारी हापूसच्या मुळावर उठले आहेत. हे रोखण्यासाठी जीआय टॅगची मोलाची मदत होणार असल्याचे कोकण भूमी प्रतिष्ठानचे संजय यादवराव यांनी सांगितले.