विलेपार्लेतील साठ्ये कॉलेजच्या प्राध्यापिका मनीषा भावे (५०) यांचा मृतदेह बुधवारी राहत्या घरी आढळला. अंधेरी पूर्वेकडील गौरेश अपार्टमेंटमध्ये त्या राहात होत्या. भावे यांच्या घरातून दुर्गंधी येत असल्याने त्यांच्या शेजाऱ्यांनी पोलिस, अग्निशमन दलाला बोलावून घेतले असता भावे यांचा मृतदेह घरात कुजलेल्या अवस्थेत आढळला. पोलिसांनी तो शवचिकित्सेसाठी कूपर रुग्णालयात पाठविला आहे.
अंधेरी पोलिस ठाण्याचे वरिष्ठ पोलिस निरीक्षक पंडित थोरात यांनी दिलेल्या माहितीनुसार, भावे साठ्ये कॉलेजात इतिहास विषय शिकवत होत्या. त्या घटस्फोटीत होत्या आणि घरात एकट्याच राहात होत्या. मृतदेहाची अवस्था पाहता त्यांचा मृत्यू दोन-तीन दिवस आधीच झाला असावा, असा अंदाज आहे. हृदयविकाराच्या झटक्याने त्यांचा मृत्यू झाल्याचा तर्कही थोरात यांनी वर्तवला. शवविच्छेदनानंतर भावे यांच्या मृत्यूचे नेमके कारण स्पष्ट होईल, असेही त्यांनी सांगितले.
भावे यांच्या घराचा दरवाजा आतून बंद होता. घरातील सर्व वस्तू जागच्या जागी आढळल्या. त्यावरून भावे यांच्या मृत्यूप्रकरणात सध्या तरी संशयास्पद असे काहीही नाही, असे थोरात यांनी स्पष्ट केले.