आग्रा येथे काल सायंकाळी आलेल्या वादळामुळे सर्वसामान्याचे हाल झालेच, पण जगातील सात आश्चर्यांपैकी एक असलेल्या ताजमहललाही मोठा तडाखा बसला आहे. वादळामुळे ताजमहलचे दोन दगडी मिनार कोसळले असून घुमट जमीनदोस्त झाला आहे.
काल सायंकाळी साडेसातच्या सुमारास उत्तर प्रदेशला वादळाचा जबरदस्त तडाखा बसला. आग्रामध्ये ताशी १३० किलोमीटर वेगाने वारे वाहत होते. त्यामुळे ताजमहलच्या दक्षिण गेट आणि रॉयल गेट्सचे दगडी मिनार कोसळल्या. तसेच, ताजमहलचा पांढऱ्या रंगाचा छोटा घुमटही पडल्याने तुटून गेला आहे. दरम्यान, या संदर्भात भारतीय पुरातत्त्व विभागाच्या अधिकाऱ्यांशी संपर्क होऊ शकला नाही.
ताजमहलचा मुख्य दरवाजा आणि दरवाजा-ए- रौजावरील १२ फुटी मिनारही वादळामुळे कोलमडली आहे. विशेष म्हणजे ताजमहलचं दर्शन सर्वात आधी याच दरवाजातून होत असतं. वादळामुळे आग्रा शहरात प्रचंड नुकसान झालं आहे. अनेक ठिकाणी वृक्ष आणि विजेचे खांब उन्मळून पडले आहेत. केवळ अर्ध्या तासात मोठा हाहाकार माजवणाऱ्या या वादळात मथुरेत चार तर बिजनौरमध्ये एका व्यक्ती दगावला आहे. वादळ ओसरल्यानंतर येथील तापमान कमालीचं घटलं असून २२ अंश सेल्सिअस इतकी तापमानाची नोंद झाली आहे.
याआधी २०१६ मध्ये ताजमहलचे मिनार कोसळले होते. साफसफाईच्या कामामुळे हे मिनार कोसळले असावेत, अशी शक्यता तेव्हा वर्तविण्यात आली होती. तर, वानरांच्या उपद्रवांमुळे तो प्रकार घडल्याचं पुरातत्त्व विभागानं स्पष्ट केलं होतं.