केंद्रीय लोकसेवा आयोगाच्या (यूपीएससी) परीक्षेत सन २०१५मध्ये देशातून प्रथम आलेली टीना दाबी आणि दुसरा आलेला अतहर आमिर उल शफी खान हे दोघे नुकतेच विवाहबंधनात अडकले. जम्मू काश्मिरमधली निसर्गरम्य पहलगाम क्लबमध्ये नातेवाईक आणि मित्रपरिवाराच्या उपस्थितीत या दोघांचा विवाहसोहळा पार पडला. त्यानंतर अतहरच्या कुटुंबीयांनी एका स्वागत समारंभाचे आयोजन केले होते.
नवी दिल्लीतील कार्मिक व प्रशिक्षण कार्यालय विभागात प्रशिक्षणादरम्यान टीना दाबी आणि अतहर यांच्यात प्रेम फुलले. एखाद्या चित्रपटात किंवा कादंबरीत शोभावी अशीच ही प्रेमकहाणी आहे. या दोघांनी जगापासून कधीच आपले प्रेम लपवले नाही. पण त्याचमुळे त्यांना प्रचंड मनस्ताप सहन करावा लागला. सन २०१५चा यूपीएससीटा निकाल लागल्यापासून या दोघांची प्रेमकहाणी चर्चेत होती. तो पहिल्याच भेटीत माझ्या प्रेमात पडला, ही पहिली प्रतिक्रीया तिने अतहरविषयी बोलताना दिली होती.
विशेष म्हणजे या दोघांनीही त्यांच्यातील प्रेमसंबंधाबद्दल कोणताही आडपडदा ठेवलेला नाही. सोशल मीडियाच्या माध्यमातून या दोघांनीही आपल्या प्रेमाची कबुली जगाला दिली होती. त्यामुळे ‘टॉपर्स’च्या प्रेमकहाणीची चर्चा जगभर झाली. पण या दोघांच्या लग्नाला मात्र त्यानंतर तीव्र विरोध झाला. सोशल मीडियावर अनेकांनी त्यांच्या नात्यावर सडकून टीका केली होती. अतहर आमिर खानचे टीना दाबीबरोबरील लग्न म्हणजे भारतात सुरू असलेल्या लव्ह जिहादचा हा प्रकार असल्याचा आरोप काही कट्टरवाद्यांनी २०१६मध्ये केला. मात्र या टीकांना न घाबरता या दोघांनी अखेर लग्न केले आणि आपली प्रेमकहाणी यशस्वी करून दाखवली.