कुमठेकर रोडवर परिसरात एका प्राध्यापक महिलेने लग्न ठरत नसल्याच्या नैराश्यातून घरात गळफास घेऊन आत्महत्या केल्याची सोमवारी सकाळी उघडकीस आली. या प्रकरणी विश्रामबाग पोलिस ठाण्यात अकस्मात मृत्यूची नोंद करण्यात आली आहे.
स्नेहल संतोष शहा (वय ३४, रा. ६८५/८६, सदाशिव पेठ, कुमठेकर रोड) असे आत्महत्या केलेल्या महिलेचे नाव आहे. पोलिसांनी दिलेल्या माहितीनुसार, सदाशिव पेठेत स्नेहल, त्यांची आई, वडील आणि चुलत भाऊ असे राहायला आहेत. स्नेहल या प्राध्यापिका असून, त्यांनी टिळक रस्त्यावरील एका नामांकित महविद्यालयात नोकरी केली आहे. काही महिन्यांपूर्वी त्यांनी ही नोकरी सोडून दिली. यापूर्वीही दोन ठिकाणी त्यांनी प्राध्यापक म्हणून नोकरी केली आहे.
सोमवारी सकाळी साडेआठच्या सुमारास स्नेहल यांनी घरातील पंख्याला गळफास घेऊन आत्महत्या केल्याचे स्नेहल यांच्या भावाने पाहिले. याबाबत त्यांनी त्वरित पोलिसांना माहिती दिली. विश्रामबाग पोलिसांनी घटनास्थळी येऊन त्यांचा मृतदेह खाली घेतला. पोलिसांना स्नेहल यांनी लिहून ठेवलेली चिठ्ठी मिळाली असून त्यामध्ये माझ्या मृत्यूला कोणालाही जबाबदार धरू नये, असे लिहिले आहे. स्नेहल यांचे लग्न ठरत नसल्याने त्या काही काळापासून नैराश्यामध्ये होत्या, असे पोलिसांनी केलेल्या तपासामध्ये समोर आले आहे. पुढील तपास विश्रामबाग पोलिस करत आहेत.