पती कर्नल संतोष महाडिक यांना हौतात्म्य आल्यानंतर खचून न जाता स्वत: लष्करात दाखल झालेल्या स्वाती महाडिक यांच्या जीवन संघर्षाची कहाणी शालेय अभ्यासक्रमात समाविष्ट करण्यात आली आहे. इयत्ता दहावीच्या पुस्तकात त्यांच्यावरील धड्याचा समावेश करण्यात आला असून बालभारतीने घेतलेल्या या निर्णयाचे स्वागत होत आहे.
कर्नल संतोष महाडिक यांना हौतात्म्य आल्यानंतर स्वाती महाडिक खचल्या नाहीत. उलट त्यांनी सीमेवर जाऊन शत्रूशी लढा देण्याचा निर्धार केला आणि त्या लष्करात लेफ्टनंटपदावर दाखलही झाल्या. त्याची दखल राज्य मराठी पाठ्यपुस्तक निर्मिती मंडळाने घेऊन स्वाती यांच्यावरील धड्याचा समावेश इयत्ता दहावीच्या मराठीच्या पुस्तकात केला आहे.
या पुस्तकात ‘सन्मान एका महिला सैनिकाचा’ या नावानं स्वाती महाडिक यांच्यावरील धडा समाविष्ट करण्यात आला आहे. स्वाती यांची कौटुंबिक स्थिती, पतीचं निधन, घरची जबाबदारी आणि लष्करात दाखल होऊन त्यांनी घेतलेली खडतर ट्रेनिंग याची चित्तरकथा या धड्यातून सांगण्यात आली आहे. विद्यार्थी आणि विद्यार्थीनींना प्रेरणा मिळावी म्हणून स्वाती यांचा जीवनसंघर्ष धड्यातून उलगडण्यात आला आहे. पतीला वीरमरण आल्यानंतर त्यांच्या अंत्यसंस्कारावेळी स्वाती यांनी कर्नल महाडिक यांचे देशसेवेचं स्वप्न पूर्ण करण्याची शपथ घेतली होती, तो प्रसंगही या पुस्तकात नमूद करण्यात आला आहे.
लष्करात दाखल होण्यासाठी स्वाती यांनी स्टाफ सिलेक्शन बोर्डाची परीक्षा देण्याचा निर्णय घेतला होता.स्वाती यांना लष्कर व संरक्षणमंत्र्यांनी फक्त वयाच्या अटीत सूट दिली होती. त्यानंतर दोन लहान मुलांना घरी ठेवून स्वाती यांनी पुणे गाठले. खडतर अभ्यासानंतर अवघ्या नऊ महिन्यात त्या या परीक्षेत यशस्वीही झाल्या. त्यानंतर चेन्नई येथील ऑफिसर्स ट्रेनिंग अॅकॅडमी (ओटीए) मधून त्यांनी आपले खडतर प्रशिक्षण पूर्ण केले. पुण्याच्या सावित्रीबाई फुले पुणे विद्यापीठातून एम. ए. झालेल्या स्वाती यांनी ऑटिझम असलेल्या मुलांबाबत विशेष प्रशिक्षणही घेतले आहे. संतोष यांच्यासोबत बदलीच्या ठिकाणी त्या केंद्रीय विद्यालयामध्ये शिक्षिका म्हणूनही काम करत होत्या. एका लष्करी अधिकाऱ्याची पत्नी, शिक्षिका ते स्वतः लष्करी अधिकारी बनण्याचा प्रवास त्यांच्यासाठी खूपच खडतर होता. सध्या स्वाती लष्कराच्या ऑर्डनन्स कोअरमध्ये लेफ्टनंट पदावर कार्यरत आहेत. त्यांचा हा खडतर प्रवास विद्यार्थ्यांसाठी प्रेरणादायी असल्याने त्याचा पाठ्यपुस्तकात समावेश करण्यात आला आहे.