कल्याण पूर्वेकडील काटेमानवली परिसरात साईनगर साईदर्शन चाळीत राहणारी ५५ वर्षीय महिला मंगळवारी दुपारी अडीच वाजण्याच्या सुमारास विठ्ठलवाडी रेल्वे स्थानकाहून घरच्या दिशेने पायी जात असताना दोन अज्ञात व्यक्तींनी त्यांना हटकले. दादरला कसे जायचे, असे या महिलेला विचारत तिच्यासोबत रिक्षात बसले. खडेगोळवली येथे ही महिला रिक्षातून उतरली असता त्यांनी या महिलेचा पाठलाग करत पुन्हा महाविद्यालयानजीक तिला गाठले. तुमच्या कानातले आणि गळ्यातले सोन्याचे दागिने आम्हाला द्या, असे सांगत बोलण्यात गुंतवून त्यांच्याजवळील ४९ हजार ५०० रुपयांचे सोन्याचे दागिने घेत तेथून पळ काढला. आपली फसवणूक झाल्याचे लक्षात आल्यानंतर महिलेने या प्रकरणी कोळसेवाडी पोलिस ठाण्यात तक्रार नोंदवली. या तक्रारीनुसार पोलिसांनी अज्ञात दुकलीविरोधात गुन्हा दाखल केला आहे.