हिंदी चित्रपटसृष्टीतील अभिनेत्री उर्वशी रौटेला हिच्या बनावट आधारकार्डाचा वापर करून वांद्रे येथील एका पंचतारांकित हॉटेलमध्ये खोली आरक्षित केल्याचे उघड झाले. बनावट आधारकार्ड वापरून खोली आरक्षित केल्याचे समजताच या अभिनेत्रीला प्रचंड धक्का बसला आहे. या प्रकारामुळे बनावट आधारकार्डच्या वापरामुळे वैयक्तिक माहितीचा मुद्दा पुन्हा एकदा चर्चेत आला आहे.
अभिनेत्री उर्वशी रौटेला हिने ‘सिंग सहाब दी ग्रेट’,’सनम रे, ‘काबिल’ या चित्रपटात काम केले आहे. मंगळवारी रात्री ती वांद्रे येथील या हॉटेलमध्ये एका कार्यक्रमासाठी गेली होती. त्यावेळी तुमची खोली आरक्षित झाली असल्याची माहिती हॉटेल व्यवस्थापनाने उर्वशीला दिली. पण आपण कोणतीही खोली आरक्षित केली नसल्याचे हॉटेलला सांगितले. या प्रकारामुळे उर्वशी चक्रावली. तिने जाऊन आरक्षणाविषयी माहिती तपासली तेव्हा एका अज्ञात व्यक्तीने तिच्या आधारकार्डचा वापर करून या हॉटेलमध्ये ऑनलाइन खोली आरक्षित केली होती. उर्वशीने या प्रकरणी वांद्रे पोलिस ठाण्यात तक्रार दाखल केली आहे. पोलिसांनी अज्ञात व्यक्तीच्या विरोधात गुन्हा दाखल केला आहे.