पोलिस दलात सांगली येथे कार्यरत असतानाही एक कॉन्स्टेबल ठाणे पोलिस आयुक्तालयाच्या पोलिस शिपाई पदाच्या भरती प्रक्रियेमध्ये सहभागी झाल्याचा प्रकार समोर आला आहे. मैदानी चाचणीच्या वेळी या कॉन्स्टेबलला त्याच्या बॅचमेटनेच ओळखल्याने त्याचे बिंग फुटले. भरती प्रक्रियेत सहभागी होण्यामागे या कॉन्स्टेबलचा उद्देश काय होता, याची चौकशी ठाणे पोलिसांनी सुरू केली आहे. दरम्यान, या कॉन्स्टेबलवर शिस्तभंगाची कारवाई करण्यात यावी, असा अहवाल ठाणे पोलिसांनी सांगली पोलिसांना पाठवला असल्याची माहिती एका वरिष्ठ पोलिस अधिकाऱ्याने दिली.
ठाणे पोलिस आयुक्तालयात २३८ पोलिस शिपाई पदे भरण्यात येणार असून त्याकरीता ठाण्यातील साकेत येथील पोलिस क्रीडासंकुलात उमदेवारांची मैदानी चाचणी घेण्यात येत आहे. सुमारे ४९ हजार उमेदवारांचे अर्ज आले असून यामध्ये उच्चशिक्षित उमेदवारही आहेत. सांगली पोलिस दलातील कॉन्स्टेबल संग्राम साळुंखे आणि त्याच्या मित्रानेदेखील पोलिस शिपाई पदासाठी रितसर अर्ज केला होता. दोघांनीही भरतीच्या सर्व प्रक्रिया पार पाडल्या होत्या. त्यांचे बायोमॅट्रिकही झाले होते. साळुंखे याने लांब उडी, १०० मीटर धावणे, पूलअप्स, गोळाफेक आदी चाचण्या दिल्या होत्या. मात्र या चाचणीत साळुंखे याच्यापेक्षा त्याच्या मित्राला जास्त गुण मिळाले असल्याची माहिती पुढे आली आहे. परंतु अगोदरच पोलिस दलाचा कर्मचारी असलेला साळुंखे हा पुन्हा भरती प्रक्रियेत सहभागी झाल्याची बाब प्रारंभी लक्षात आली नव्हती. मात्र, मैदानी चाचणीवेळी त्याच्याच एका बॅचमेटनने त्याला पाहिले.आणि साळुंखे याचे बिंग फुटल्यानंतर एकच खळबळ उडाली. पोलिस कर्मचारी असूनही साळुंखे याने भरतीमध्ये सहभाग का घेतला, असा प्रश्न या प्रकारानंतर निर्माण झाला आहे.