जिल्हा परिषद प्राथमिक शाळेतील विद्यार्थ्यांसाठी असलेल्या शालेय पोषण आहारातील ४० किलो चवळीचा अपहार केल्याप्रकरणी प्राथमिक शिक्षकास मंगळवारी मनमाड न्यायालयाने एक वर्ष सक्तमजुरीची शिक्षा सुनावली आहे. सन २०१६ पासून सुरू असलेल्या या खटल्याचा न्यायाधीश स्वाती फुलबांधे यांनी अंतिम निकाल दिला. त्यात सदर प्राथमिक शिक्षकास दोषी ठरविण्यात येऊन शिक्षा ठोठावण्यात आली आहे. सध्या हे शिक्षक देवळा येथील जि. प. च्या शाळेत नोकरीस आहेत.
पाणेवाडी येथील जि. प प्राथमिक शाळेच्या विद्यार्थ्यांसाठी असलेल्या शालेय पोषण आहारातील ४० किलो चवळी मोटार सायकल ला लावून घरी घेऊन जाज असताना प्राथमिक शिक्षक किशोर ततार यांना सरपंच व ग्रामस्थांनी रंगेहाथ पकडले होते. त्यांच्यावर मनमाड पोलिसांनी गुन्हा दाखल केला होता. याबाबत मनमाड न्यायालयात खटला चालविण्यात आला. मंगळवारी न्यायाधीश स्वाती फुलबांधे यांनी ततार यांना दोषी ठरवून एक वर्ष सक्तमजुरीची शिक्षा ठोठावली. त्यासह ५ हजार रुपये दंड आकारण्यात आला. दंड न भरल्यास १५ दिवस अधिक कैद अशी शिक्षा सुनावण्यात आली. या प्रकरणामुळे प्राथमिक शिक्षकांमध्ये प्रचंड घबराहट पसरली आहे.