भारतीय पुरातत्त्व विद्येचे ज्येष्ठ अभ्यासक मधुकर केशव तथा म. के. ढवळीकर (वय ८७) यांचे मंगळवारी अल्पशा आजाराने निधन झाले. त्यांच्या पश्चात त्यांचे चिरंजीव लेखक चंद्रशेखर ढवळीकर, दोन मुली, सुना, नातवंडे असा परिवार आहे. आज (बुधवारी) सकाळी ७ ते ९ या वेळेत ढवळीकर यांचे पार्थिव मयूर कॉलनी येथील त्यांच्या निवासस्थानी अंत्यदर्शनासाठी ठेवण्यात येणार असून, दहा वाजता वैकुंठ स्मशानभूमीत अंत्यसंस्कार करण्यात येणार आहेत.
डॉ. म. के. ढवळीकर यांचा जन्म १६ मे १९३० रोजी झाला. तत्कालीन पुणे विद्यापीठातून एमए आणि पुरातत्त्वशास्त्रात डॉक्टरेट मिळविली. भारतीय पुरातत्त्व विभागात त्यांनी आपल्या कार्यास सुरुवात केली. इनामगावचे उत्खनन प्रकल्प, गुजरातमधील मोरवीजवळ कुंतासी येथे सिंधू संस्कृतीचे संशोधन, असे विपुल संशोधन त्यांनी केले. भारतीय पुरातत्वशास्त्र आणि कला, हा त्यांच्या अभ्यासाचा विषय होता. डेक्कन महाविद्यालयाचे ते संचालकही होते; तसेच इंडियन आर्किऑलॉजिकल सोसायटीचे सचिव, रांची येथील सायन्स काँग्रेसच्या पुरातत्त्वशास्त्र आणि मानववंशशास्त्र विभागाचे अध्यक्ष, सोलापूर येथील महाराष्ट्र इतिहास परिषदेचे अध्यक्ष, महाराष्ट्र प्राच्यविद्या परिषदेचे अध्यक्ष अशी विविध पदे त्यांनी भूषविली. क्यूबातील हवाना विद्यापीठ, डॉ. बाबासाहेब आंबेडकर मराठवाडा विद्यापीठ,राष्ट्रसंत तुकडोजी महाराज नागपूर विद्यापीठ, अलाहाबाद विद्यापीठ अशा अनेक संस्थांमध्ये त्यांनी अध्यापन केले. त्यांच्या या कार्याबद्दल २०११ मध्ये त्यांना पद्मश्रीने गौरविण्यात आले होते. तसेच पंतप्रधान सुवर्ण पदक, एशियाटिक सोसायटीचे रौप्यपदक आणि मध्य प्रदेश सरकारचा जीवनगौरव असे विविध पुरस्कार त्यांना प्रदान करण्यात आले होते. ‘पद्मश्री’ने सन्मानित ढवळीकर यांनी २७ पुस्तके लिहीली असून त्यांचे दीडशे शोधनिबंध आंतरराष्ट्रीय नियतकालिकांमध्ये प्रसिद्ध झाले आहेत.