परीक्षेत कॉपी करताना पकडल्याने पवईतील रिद्धी त्रिपाठी या आठवीच्या वर्गातील मुलीने सोमवारी सायंकाळी राहत्या घरी पोटमाळ्यावर गळफास घेऊन आत्महत्या केल्याची धक्कादायक घटना उघडकीस आली आहे. कुर्ला येथील सेंट मायकेल शाळेत शिकणाऱ्या या मुलीच्या पॅडवर परीक्षेदरम्यान काहीतरी लिहिलेले आढळले. याप्रकरणी तिच्या शिक्षकांनी व मुख्याध्यापकांनी तिच्या कुटुंबीयांना बोलावून समजही दिली होती.
परंतु या साऱ्या प्रकाराने अपमानित झालेल्या रिद्धीने घरी जाऊन सायंकाळी ७.०५ वाजता आत्महत्या केली. बराचवेळ ती कुठेही न दिसल्याने घरच्यांनी तिचा शोध सुरू केला असता, तिने लोखंडी अँगलला दोरखंड बांधून गळफास घेतल्याचे समोर आले. पोलिसांना ही माहिती दिल्यानंतर स्थानिकांच्या सहाय्याने तिला जवळच्या होली स्पिरिट रुग्णालयात दाखल करण्यात आले. मात्र उपचार सुरू असतानाच सायंकाळी ८.३०च्या सुमारास तिचे निधन झाले. या प्रकरणी पवई पोलिस अधिक तपास करत आहेत.