मध्य रेल्वेने नेरुळ ते उरण नवीन मार्गिकेच्या प्रकल्पाला वेग मिळण्याच्या दृष्टीने मध्य रेल्वेतर्फे नेरुळ येथे रविवारी विशेष ब्लॉक घेतला होता. आठ तासांचा हा मेगाब्लॉक तांत्रिक कारणांमुळे आणखी एक तास वाढल्याने हार्बर मार्गावरील प्रवाशांचे मेगा हाल झाले. वाशी ते बेलापूर लोकल या ब्लॉकमुळे वेळेत सुरू न झाल्याने प्रवाशांचा खोळंबा झाला.
यार्ड रिमॉडेलिंग आणि नवीन रुट रिले इंटरलॉकिंग (आरआरआय) यंत्रणेसाठी हा आठ तासांचा विशेष ब्लॉक घेण्यात आला होता. रेल्वे मार्गिकेतील सिग्नलसाठी आरआरआय यंत्रणा आवश्यक ठरते. ही यंत्रणा कार्यान्वित करणे जटील असून त्या पूर्ततेनंतर नेरुळ ते उरण मार्गिका प्रत्यक्षात येण्यास वेग येणार आहे. सकाळी १० वाजल्यापासून सुरू झालेला हा ब्लॉक सायं. ६ पर्यंत संपेल अशी अपेक्षा असताना तो सातच्या पुढे लांबल्याने प्रवाशांमध्ये गोंधळाचे वातावरण निर्माण झाले. हा ब्लॉक वाशी ते बेलापूर दरम्यान दोन्ही मार्गांवर आणि तुर्भे ते नेरुळ डाऊन मार्गावर घेण्यात आला. या कालावधीत ठाणे ते वाशी ट्रान्सहार्बर सेवा नियमित स्वरूपात सुरू होत्या. या कालावधीत वडाळ्याहून सुटणाऱ्या बेलापूर/पनवेल लोकल स. ९.०८ ते सायं. ७ पर्यंत आणि बेलापूर/पनवेल ते सीएसएमटी स. ९.४४ ते सायं. ७ पर्यंत सेवा खंडीत राहिल्या. मध्य आणि पश्चिम रेल्वेमार्गावर रविवारी सकाळी ११ ते दुपारी ४ पर्यंत मेगाब्लॉक घेण्यात आला.