औरंगाबाद जिल्हा कोर्टातील लिफ्ट तांत्रिक बिघाड होऊन काही कळायच्या आत अचानक चौथ्या मजल्यारून थेट तळमजल्यावर क्षणार्धात धाडकन कोसळली आणि लिफ्टचा दरवाजा आपोआप लॉक झाला. हा प्रकार लक्षात येताच पोलिस व इतरांनी प्रयत्न करून कसाबसा दरवाजा उघडला. त्यानंतर लिफ्टमधील जखमी व गुदरमरलेल्या सात जणांनी मोकळा श्वास घेतला. या घटनेत लिफ्टचे सिलिंगही तुटले आणि बहुतेकांना चांगलाच मुका मार लागला आहे. ही घटना जिल्हा कोर्टाच्या मुख्य प्रवेशद्वारालगत सोमवारी (२६ मार्च) सायंकाळी घडली.
जिल्हा कोर्टातील पाच-सव्वापाचची वेळ. कोर्टातील काम आटोपून घरी जाण्याचे वेध लागलेले. अशा स्थितीत पक्षकार, नागरिक, वकील, असे सातजण चौथ्या मजल्यावरून लिफ्टमध्ये बसले आणि बहुतेकांना तळमजल्यावर उतरायचे होते. लिफ्टमध्ये सर्व सातजण बसले आणि तळमजल्याचे बटन दाबण्यात आले. मात्र क्षणार्धात लिफ्टचा नेहमीचा वेग अचानक कितीतरी पटींनी वाढला आणि काही कळायच्या आत लिफ्ट तळमजल्यावर कोसळली. त्याचक्षणी भला मोठा आवाज झाला आणि लोक सैरावैरा पळाले. काही क्षणात तो आवाज लिफ्टचाच असल्याचे स्पष्ट झाल्यानंतर इतरांनी मदतीसाटी धाव घेतली. पण, तोपर्यंत लिफ्टचा दरवाजा आपोआप लॉक झाल्याने तिच्यात अडकलेल्यांचा ओरडण्याचा आवाज, लिफ्टच्या आतून दारावरील थापा ऐकू येऊ लागल्या. प्रयत्न करुनही दरवाजा उघडत नसल्याने अस्वस्थता आणखीच वाढत गेली. त्याच परिसरात न्यायालयीन कामासाठी आलेल्या पोलिसांनीही दार उघडण्याचे प्रयत्न सुरू केले. तब्बल १० ते १५ मिनिटांच्या अथक प्रयत्नानंतर दरवाजा कसाबसा उघडला. तिच्यात अडकून गुदमरलेल्या सातजणांची सुटका करण्यात आली. ‘वाचलो एकदाचे’ अशी बोलकी प्रतिक्रिया माणिकचंद आसाराम महतोले, ओमप्रकाश सखाराम बसैले, निर्भय सुरेश बसैले व इतरांनी व्यक्त केली. या सातजणांमध्ये एका महिलेचा समावेश होता व काहीजण साठी पार केलेले होते.
सिलिंग पडून लागला मार
दरम्यान, लिफ्ट कोसळून जोरात आदळळ्याने लिफ्टचे सिलिंगही कोसळले व त्याचा मार लिफ्टमधील नागरिकांना बसला. बहुतेकांच्या डोक्याला, खांद्याला मार लागल्याचेही दिसून आले. या प्रकारामुळे सर्व सातजणांना जबर धक्का बसला आहे. पण, वाचल्याच्या भावना त्यांच्या चेहऱ्यावरुन स्पष्ट दिसत होत्या.
वारंवार तक्रारी, तरीही वारंवार बिघाड
लिफ्ट अचानक आणि कितीतरी वेळ बंद पडणे, दरवाजा लॉक होणे, असे प्रकार जिल्हा कोर्टात नेहमीच घडतात. दर दोन-चार दिवसांत कोणीतरी वकील, पक्षकार किंवा कोर्टाचा अधिकारी-कर्मचारी लिफ्टमध्ये अडकतो, असेही वकिलांनी या घटनेनंतर आवर्जून सांगितले. कोर्ट परिसरातील सर्व लिफ्टबाबत कमी-अधिक प्रमाणात असेच प्रकार घडतात. याबाबत वारंवार तक्रारी करण्यात आल्या आहेत; तरीदेखील कायमस्वरुपी दुरुस्तीकडे सर्रास दुर्लक्ष केले जाते, अशा तक्रारी वकिलांनी बोलून दाखवल्या. लिफ्ट चालवण्यासाठी स्वतंत्र कर्मचाऱ्याची नियुक्ती केली जावी, अशीही वकिलांची मागणी आहे. मात्र त्याकडेही दुर्लक्ष केले जात असल्याचा वकिलांचा आरोप आहे.