ऑनलाइन पेमेंट करताना सावधगिरी बाळगण्याची गरज दक्षिण मुंबईत घडलेल्या एका घटनेमुळे अधोरेखित झाली आहे. कोणतेही ऑनलाइन पेमेंट करण्यापूर्वी बँकेकडून आपल्या मोबाइलमध्ये एक वन टाइम पासवर्ड (ओटीपी) येतो. हा क्रमांक कोणाला सांगणं किती महागात पडू शकतं याचा अनुभव अँटॉप हिलमधील एका गृहिणीला आलाय. कारण अवघ्या १० रुपयांच्या पेमेंटसाठी या महिलेला ७५ हजार रुपयांचा फटका बसलाय.
अँटॉप हिलमध्ये राहणाऱ्या ३७ वर्षीय रंजनी मेनन यांना एका टेलीकॉलरने ओटीपी विचारला आणि एका पोर्टलवर अपलोड केलेल्या त्यांच्या बायोडेटाविषयी चौकशी केली. ही घटना आहे ६ फेब्रुवारीची. या कॉलरला ओटीपी सांगितल्यानंतर रंजनी यांच्या खात्यातून ७५ हजार रुपये वजा झाले. नंतर कळलं ही हे सर्व पैसे एका ई-वॉलेटवर ट्रान्सफर झाले आणि पुढील २० मिनिटांत १० वेळा पैसे काढण्यात आले.
प्रिया शर्मा असं नाव सांगितलेल्या टेलीकॉलरचा रंजनी यांना फोन आला. रंजनी यांनी ज्या जॉब पोर्टलवर आपला बायोडेटा अपलोड केला होता, त्या जॉब पोर्टलमधून आपण बोलत असल्याचे या प्रिया शर्माने सांगितले. या पोर्टलसाठी १० रुपये प्रोसेसिंग फी लागेल, असं तिने रंजनी यांना सांगितले.
अँटॉप हिल पोलिसांच्या माहितीनुसार फसवणूक करणाऱ्या महिलेला रंजनी यांनी पेमेंट करण्याचा प्रयत्न केला तेव्हाच कार्ड डिटेल्स मिळाले होते. त्यानंतर तिने ओटीपी विचारला.