झोपेत घोरणे हे इतरांना त्रासदायक आणि नकोसं वाटतं. मुंबईहून सुटलेल्या एक्स्प्रेसमधील प्रवाशांनाही असाच वाईट अनुभव आला. त्यांनी जोरजोरानं घोरणाऱ्या आणि सगळ्यांची झोप उडवणाऱ्या एका प्रवाशाला अजब ‘शिक्षा’ दिली. त्यांनी घोरणाऱ्या प्रवाशासोबत वाद घातला. सहप्रवाशांचा रुद्रावतार पाहून या प्रवाशाला प्रवासादरम्यान जागं राहावं लागलं.
मिळालेल्या माहितीनुसार, रामचंद्र नावाचा प्रवासी मुंबईतील लोकमान्य टिळक टर्मिनसमधून सुटणाऱ्या एलटीटी-दरभंगा एक्स्प्रेसमधून प्रवास करत होता. प्रवासात त्याला गाढ झोप लागली. तो जोरजोरानं घोरू लागला. त्यामुळं त्रस्त झालेल्या आठ ते दहा सहप्रवाशांनी त्याच्याशी वाद घातला. त्यांनी टीसीला कळवलं. टीसीनं हस्तक्षेप करत वाद मिटवण्याचा प्रयत्न केला. संताप अनावर झालेल्या सहप्रवाशांना बघून रामचंद्रनं प्रवासात न झोपण्याचा निर्णय घेतला.
‘रेल्वेच्या नियमानुसार एक्स्प्रेसमध्ये झोपलेल्या प्रवाशाला त्रास देणं चुकीचं असल्याचं इतर प्रवाशांना सांगितलं. मात्र, रामचंद्र झोपेत जोरजोराने घोरत असल्याने त्रास झाल्याचं अनेकांनी सांगितलं. रामचंद्र आणि सहप्रवाशांमध्ये वादही झाला. त्यात मी हस्तक्षेप केल्यानंतर रामचंद्र यानं प्रवासादरम्यान न झोपण्याचा निर्णय घेतला. त्यामुळं सहप्रवाशांनी सुटकेचा निश्वास सोडला,’ असं टीसी गणेश विरहा यांनी सांगितलं.