हैदराबादमधील एका २४ वर्षीय व्यक्तीने पत्नीच्या विरोधात घरगुती हिंसेची तक्रार दाखल केली आहे. एवढ्यावरच न थांबता, पत्नी शिवी देते म्हणून त्याने चक्क कोर्टात नुकसानभरपाईची मागणी केली आहे.
विजयवाडाच्या अतिरिक्त मुख्य न्यायदंडाधिकाऱ्यांच्या कोर्टात ही याचिका दाखल करण्यात आली आहे. पत्नी साई चैतन्या हिला नोटीसही बजावण्यात आली आहे.
पती कुमार याने याचिकेत म्हटलंय की त्याचं चैतन्यासोबत २०१७ मध्ये त्याचं लग्न झालं, पण दोन महिन्यांतच ते वेगळे राहू लागले. चैतन्याने आपलं आधीचं लग्न आणि १२ वर्षांच्या मुलीविषयी काहीही सांगितलं नव्हतं, असा आरोप कुमारने केला आहे.
कुमारने कौटुंबिक हिंसेच्या कलम १२ अंतर्गत कारवाईची मागणी केली आहे. मानसिक छळासाठी नुकसानभरपाई, लग्नाला झालेल्या खर्चाचे अडीच लाख रुपये तसेच शिव्यांपासून संरक्षणाची मागणी केली आहे. या प्रकरणाची सुनावणी आता २१ फेब्रुवारीला होणार आहे.