कोराडी पोलिस स्टेशनअंतर्गत येणाऱ्या चक्कीखापा येथे दोन गटात दंगल उसळली. यात सामाजिक कार्यकर्त्यासह सहा जण जखमी झालेत. या घटनेने चक्कीखापा भागात तणावाचे वातावरण आहे. विवेक सिसोदिया, त्यांची दोन मुले व दुसऱ्या गटातील अन्य तिघे, अशी जखमींची नावे आहेत.
सिसोदिया यांनी पोलिसांत दिलेल्या तक्रारीनुसार, राष्ट्रीय महामार्ग प्राधिकरणातर्फे चक्की खापा भागात रिंगरोडचे काम सुरू आहे. या कामात घोटाळा झाल्याचा आरोप सिसोदिया यांनी केला. त्यामुळे गावातील नेते आपला राग करीत होते. मंगळवारी सायंकाळी बांधकाम करणाऱ्या कंत्राटदाराचे कामगार व गावातील काही ग्रामस्थांनी आपल्यावर व मुलांवर हल्ला केला. प्रतिकारात अन्य तिघे जखमी झालेत. तर सिसोदिया यांच्या शेतातील लिंबू व कापूस चोरल्याचा आरोप ग्रामस्थांवर करण्यात आला. सिसोदिया यांनी आम्हाला चोर म्हटले होते. त्यावरून वाद झाला, अशी तक्रार ग्रामस्थांनी पोलिसांत दिली आहे. दोन्ही गटाच्या तक्रारी घेण्यात आल्या आहे. कायद्यानुसार कारवाई करण्यात येईल,अशी माहिती कोराडी पोलिस स्टेशनचे वरिष्ठ पोलिस निरीक्षक सतीश गोराटे यांनी दिली.
नागपूर, लकडगंजमधील छाप्रूनगर भागात मंगळवारी सायंकाळी तृतीयपंथींच्या दोन गटांतही हाणामारी झाल्याने तणाव निर्माण झाला होता. या घटनेत दोन्ही गटांतील चार जण जखमी झाले. लकडगंज पोलिसांनी दोन्ही गटाविरुद्ध दंगलीचा गुन्हा दाखल केला आहे.